(AP) – Autoridadnan di salud ta purbando di determina si inflamacion den e curason cu por tuma luga como efecto secundario di diferente tipo di inyeccion por ta un efecto secundario den hoben y adulto despues di e di dos dosis di e vacuna contra COVID_19, aunke e ta poco comun.

Un articulo tocante 7 mucha homber den diferente estado nan cu a ser publica ta entre e reportahe man mas recien di inflamacion di curason descubri despues di e vacunacion contra COVID-19, aunke un coneccion directo entre esaki cu e vacuna no a ser estableci ainda.

E hoben nan aki, di edadnan entre 14 cu 19 aña, a ricibi nan vacuna di Pfizer entre april cu mei y a cuminsa sinti dolor di pecho dentro di un par di dia despues di e segundo dosis. Imagecian radiologico di e muchanan a mustra cu tabatin un tipo di inflamacion den e musculo di e curason yama myocarditis.

Ningun no tabata den estado critico. Tur tabata suficientemente saludabel pa duna de alta despues di 2 pa 6 dia den hospital, y ta recuperando “basta bon” Dr. Preeti Jaggi, co-autor di e articulo y specialista den enfermedadnan contagioso na Emori University a bisa.

Aunke tambe el a agrega cu mester “duna e hobennan aki un siguimento pa asina por saca afo si tin un coneccion cu e vacuna of no”.

Solamente 1 di e hobennan aki tabata tin evidencia di un posibel infeccion prome cu COVID-19 y e dokter nan a determina cu ningun di nan tabatin ningun infeccion inflamatorio conecta cu e coronavirus.

E articulo aki y e casonan ta bin despues di un diagnostico cu algun hoben a ricibi na Israel despues di a ricibi nan dosis di vacuna di Pfizer.

E U.S Center for Diseas Control and Prevention a alerta dokternan luna pasa cu e tabata monitoriando un cantidad di reportahenan cu tin di haber cu inflamacion di curason den hoben nan y adultonan despues di e vacuna, specificamente esunnan traha pa Pzifer y Moderna.

E CDC no a determina te ainda si di berdad tin un coneccion directo cu e vacuna, y ta sigi urgi tur persona di 12 aña bay ariba pa vacuna nan mes contra COVID-19, pa motibo cu keda sin vacuna ta hopi mas riesgoso cu tuma e vacuna. E vacuna di Pzifer ta disponibel pa persona di 12 na bay ariba, mientras cu moderna te ainda ta pa uso solamente den adulto.

E tipo di inflamacion di curason aki por ser causa pa hopi diferente infection, incluyendo algun COVID-19 pero tambe pa algun medicamentonan. Tabatin algun reportahe cu ta concerni algun otro tipo di vacunanan tambe.

Autoridadnan lo mester saca afo cua di e caso nan cu ta concerni COVID-19 y su vacuna ta pasando frecuentemente.

CDC ta comenta cu actualmente tur pashent ta masculino y a reporta sintomanan despues di e di dos dosis y nan sintomanan a mejora bastante lihe.

“mi ta kere nos ta den e periodo di warda unda cu nos mester wak si esaki ta un causa y efecto di e vacuna of no” Dr. John Grabenstein di e Immunization Action Coalition a bisa.

Un editorial skirbi pa un pediatra a nota cu den muchanan di U.S bao di 18 aña di edad, tin ya mas cu 4 miyon caso di COVID-19, mas cu 15,000 hospitalisacion y por lo menos 300 morto.

E CDC a reporta cu hospitalisacion nan relaciona cu COVID-19 den muchanan di entre 12 cu 17 aña a baha hopi na cuminsamento di e aña pero a aumenta atrobe entre Maart y April. Rason nan posibel pa esaki ta inclui e plamamento di variantenan nobo di e virus, mas mucha regresando scol y e hecho cu tur e medidanan y reglanan di distanciamento social ta ser kita hopi trempan.

Aunke ta reporta cu e muchanan infecta no ta yega un estado critico mescos cu adulto, e datos nan cu CDC tin tocante mas o menos 200 hospitalisacion ta bisa cu hopi di nan a ricibi tratamento den cuido intensivo pero no ta menciona ningun condicion ni problema relaciona cu e curason.

CDC su director Dr. Rochelle Walensky ta bisa cu e hospitalisacionnan aki ta trese preocupacion y ta urgi mayornan pa vacuna nan yiunan. Aunke te inda e efectonan secundario di e vacuna nan no ta completamente conoci a largo plaso, e ta hopi mas riesgoso pa laga e muchanan sin vacuna.