Articulo 7 di LV ‘tijdelijke versobering bezoldigingen en voorzieningen overheid’ cu ta e ley cu ta regla austerisacion di salario den sector publico a ser scucha varios biaha den dianan aki via e sindicatonan cu ta preocupa pa motibo di cortamento di salario y cu na final di dia lo afecta pension di e ambtenaar.
Diasabra ultimo, Bon Dia Aruba a publica un articulo tocante e ley aki cu, si e mester pasa manera cu e ta na e momento aki, cu lo keda trata den e simannan cu ta bin, lo afecta salario di e empleadonan publico y den futuro lo habri posibilidad pa gobierno baha e porcentahe di e reduccion via un LB h.a.m (un decreto di indole general) cu na final lo bay afecta e salario y pension mas ainda.
Parlamento di Aruba solamente por manda nan deseo y obhecion manera ta stipula den e ‘voorhangprocedure’ menciona den e Memorie van Toelichting unda ta trata articulo 7. E proceso regular pa esaki ta cu e decreto ta 10 dia na Staten pa parlamentarionan tuma nota di esaki y por expresa un deseo o obhecion. Pero no ta asina cu gobierno ta obliga di duna oido na deseo o obhecion di banda di Parlamento.
Dialuna ultimo, Bon Dia Aruba a haci un pregunta na minister presidente Evelyn Wever-Croes tocante articulo 7 inciso 2 unda cu su persona a indica cu tin un ‘voorhangprocedure’ cu ta duna Staten oportunidad pa manda nan deseo o obhecion. E pregunta tabata si a base di un deseo por huridicamente obliga gobierno haci cambio riba e LB h.a.m segun articulo 7 di e ley aki. El a sigura cu si, parlamento semper tin e ultimo palabra y e ta esun cu ta controla gobierno y si nan no gusta un desaroyo nan por par’e y por pasa un mocion, por trece amienda, nan tin hopi herment den nan disposicion, pero, esey ta referi na e proyecto di ley aki, segun nos opinion.
Bon Dia Aruba a acerca un hurista cu a confirma cu na e momentonan aki, parlamento por haci cambio riba Articulo 7 di e proyecto di ley, nan por bin cu mocion of amienda pa cu esaki den un reunion publico, pero unavez cu a aproba e ley cu e articulo 7 manera e ta awor, e lo duna Gobierno e poder pa baha e salarionan di e ambtenaar via un LB h.a.m sin cu parlamento tin herment pa detene esaki, solamente nan por manda nan deseo (wensen) of un obhecion (bezwaar) manera cu ta stipula pa e voorhangprocedure standard cu ta den e Memorie van toelichting di e proyecto di ley aki tambe. Sin embargo, den e fase aki Staten no por para e ehecucion di un LB h.a.m cu ta mishi cu e salario di ambtenaar.
Den caso mes cu parlamento manda deseo o obhecion pa gobierno, ta na gobierno pa eventualmente duna oido na e deseo o obhecionnan aki, pero gobierno no ta obliga pa sigui e deseo o obhecion di Staten.
Pa confirma esaki, Bon Dia Aruba a tuma contacto cu lider di fraccion di partido di MEP y AVP pa haci nan e pregunta specifico, si articulo 7 pasa manera cu e ta y gobierno traha un LB h.a.m pa cambia e porcentahe di salario di ambtenaar cu cual ta reduci esaki, si por bin cu amienda of por vota riba un LB h.a.m?
Rocco Tjon, lider di Fraccion di partido MEP a declara cu tin diferente herment cu Parlamento por usa y cu gobierno mester tene cuenta cu esey. Manera por ehempel despues cu Parlamento a scucha tur stakeholder dentro di e 10 dia stipula pa e “voorhangprocedure”, den un Comision Central fraccionnan por vota pa asina wak si tin sosten pa e cambio si of no. Y esey ta sucede aworaki na varios ocasion, ora gobierno puntra pa “gevoelens” (sentimento) di Staten riba diferente tema.
Marlon Sneek, lider di fraccion di partido AVP a sigura cu ta asina cu parlamento tin herment pero pa cambia un Landsverordening (ley) pero no un LB h.a.m; ora un LB h.a.m ta bin Parlamento e parlamentarionan ta tuma nota di esaki, ta haci pregunta of ta yama un reunion publico pero pa debati riba e contenido, pero Parlamento no por cambia e contenido di e LB h.a.m.
Ademas di esaki, el a menciona cu fraccion di partido AVP tin pensa di entrega un amienda pa haci cambio den articulo 7 pa via cu nan no ta kere cu via un LB h.a.m por mishi cu e salario di e ambtenaar, sin hiba un discusion amplio y sin haya consehonan pertinente di entre otro Raad van Advies, cu por duna un bista di ki impacto esaki por tin riba e totalidad.
