Arthur Vallejo no a huramenta pero el a bira e di nuebe minister

Un biaha mas e lider di fraccion di oposicion di AVP, Marlon Sneek a critica e echo cu e tres partidonan (MEP-POR-RED) cu a uni den coalicion pa forma e gabinete Wever-Croes, no a cumpli cabalmente cu cierto promesanan cu nan a haci durante campaña. P’esey e ta tribi di bisa cu nan ta ‘categorisa nan mes como un gabinete cu ta bisa loke nan ta bay haci, y no haci locual nan ta bisa’.

Un di nan tin di haber cu e formacion di un gabinete di ocho minister. El a bisa cu e tres partidonan MEP, POR y RED a haci campaña caminda nan a priminti pueblo cu nan lo baha e cantidad di minister te cu shete pa asina reduci gasto di gobierno pa atende cu cantidad di necesidad.

Te hasta nan a yega di bisa cu ‘esun cu no por cu shete, mester bay traha cu otro hende’. Sinembargo e ta haya cu e realidad ta otro. Actualmente tin un gabinete no cu shete, pero cu 8 minister plus un, loke e ta yama un minister “di carambola”.

Segun parlamentario Sneek durante e formacion di gobierno nobo e tres partidonan di coalicion a bay di acuerdo pa supuestamente reduci cu un cartera e cantidad di minister compara cu gobierno anterior cu tabatin nuebe minister. “Esaki tabata e pildo magico pa nan soluciona tur cos”.

Sinembargo nan a otorga e ministerio di Turismo y Salubridad Publico na e mandatario Dangui Oduber kende no tin niun nocion riba e tereno di salud publico, segun sr. Sneek. “Segun mi sr. Dangui Oduber no sa ni e diferencia entre Paracetamol y Penicillin”, asina el a bisa.

Pero dia cu nan a anuncia e gabinete nobo a wordo menciona e nomber di e dokter Arthur Vallejo kende lo bira e man drechi di minister Oduber pa atende cu e cartera di salubridad publico. Pues e ta haya cu e gabinete nobo a huramenta 8 minister y nan a manda un di nuebe di carambola, ya cu sr. Vallejo ta esun cu ta bay carga e responsabilidad di e cartera aki. Pero mirando cu sr. Vallejo no a wordo nombra oficialmente ni huramenta den e cartera aki, parlamentario Sneek kier wak ki autoridad e ta bay tin pa reuni cu e diferente partner di salud.

Tambe fraccion di oposicion kier sa kico ta bay bira sr. Vallejo su salario y cuanto hende ta bay traha cu ne pasobra e ta haya cu e persona aki lo bira un minister riba su mes, pero no huramenta. Parlamentario Sneek ta lamenta e forma cu nan ta purba gaña comunidad.

Otro punto cu parlamentario Sneek a trece dilanti pa demostra cu gabinete Wever-Croes ta un gobierno cu ta bisa kico ta bay haci y no haci loke nan ta bisa, ta e decision di partido RED di apunta Rudy Lampe kende tabata candidato number dos riba nan lista, como minister di Enseñansa.

Segun parlamentario Sneek, e decision aki ta contrario na loke partido RED a propaganda durante campaña, ya cu nan a vocifera cu nan lo nombra minister no politico si nan ta haya e confiansa di pueblo pa bay den gobernacion, ya cu esun cu ta bay riba lista ta pa bira parlamentario. Pero a sosode net lo contrario violando e statutonan di nan propio partido, segun sr. Sneek.

Reaccion RED
Segun reaccion di partido RED nan a elimina e Art 20.5 for di nan statuto na aña 2009. E decision aki a cay despues di eleccion di e aña ey, caminda nan partido a perde su unico asiento. Den e caso aki, RED ta para pa un gobernacion di experto of loke nan ta cataloga como un ‘zakenkabinet’. Nan ta argumenta cu mirando cu 8 aña pasa nan a bin cu eliminacion di e articulo menciona for di nan statuto, esaki no ta nifica mas cu un persona cu ta posee e estudio y experticio riba nan lista no lo por bira minister. Esaki ta e caso di Rudy Lampe, segun partido RED.