Na Aruba ta existi un cantidad di mas o menos 100 caha di orgel. Un instrumento cu a haci su entrada na Aruba via importacion di Alemania via Venezuela, despues a keda introduci na Corsou y despues a cuminsa yega Aruba tambe, como un siglo pasa. Tempo cu el a yega Aruba no tabatin e personanan adecua pa siña otronan con pa traha cu e instrumento aki y e doñonan mester a yuda nan mes pa mantene y mehora nan caha.

Diasabra awor, 2 di november na Museo Historico di Aruba, na Fort Zoutman, lo celebra e Festival di Caha di Orgel. E idea tras di e festival ta cu hende por asisti hunto cu nan famia, cu hoben y mucha pa conoce mas di su tecnica, con ta traha y con ta toca un caha di orgel, y di e manera aki por crea un estimulo den e generacion nobo pa balora y aprecia e musica propio di Aruba.

Pa hopi aña, hende a traha caha di orgel te dia di awe, aunke cu e parti di cultura aki a keda un poco den sombra ya ta cu hopi hende ta considera un caha di orgel como algo pa hende grandi.

Durante un entrevista special cu Bon Dia Aruba a tene cu Arthur Kelly, presentador di e festival y tocado di e instrumento di musica aki. El a conta cu caha di orgel a cuminsa yega na Aruba na aña 1919 y asina a keda manteni como parti di cultura, y a evoluciona di un caha cu tabatin melodia manera, bolero, musica Europeo aden, te na algo unda hende mes tabata crea nan mesun ritmonan, por ehempel tumba, danza, polka, cu ta haci’e y dun’e su autenticidad Arubiano.

Na e momentonan aki, tin dos persona na bida, cu ta hende grandi, cu 80 y 70 aña respectivamente, cu ainda ta traha riba caha di orgel, pero no tin hende pa sigui cu esey, kiermen cu si mañan e personanan aki no t’ey mas, kico ta bay pasa cu musica, trahamento y drechamento caha di orgel? P’esey Kelly a bisa cu mester involucra mas hoben den esey pa por sigui cu e arte aki.

Mariana Kelly, organisado di e festival na Museo Historico di Aruba a conta cu aña pasa Arthur a comenta cu e lo kier haci algo pa pone caha di orgel mas den bista di hende y asina a yega na e di dos edicion aki.

El a bisa cu e festival ta pa mustra e diferente cahanan na un luga central cu tur hende na Aruba conoce. Loke nan ta desea ta pa e folklore y cultura aki no bay perdi, ya cu mucha no ta haya esaki den nan curriculum na scol. Ta p’esey diasabra awor nan lo presenta 10 diferente caha di orgel cu diferente musica y cantica.