Arthur Dowers Parlamentario fraccion AVP: Gobierno cu medida robes y sin enfasis riba motivacion pa evita contagio di virus

Pueblo a perde tur confiansa den e maneho di Gobierno pa loke ta corona virus segun miembro di fraccion di AVP, Arthur Dowers a trece dilanti sigur ora cu ta sigui tuma cierto medidanan cu gobierno mes no por hustifica.

Segun Dowers for di momento cu gobierno a habri frontera bek sin cu a duna informacion corecto na pueblo, caminda nan a crea e expectativa y impresion cu tur hende lo ta safe, a habri luganan cu mundialmente ta conoci di ta luganan cu ta ‘super spreaders’ manera cierto eventonan y areanan. Ta increibel con gobierno ta bon na altura di con e virus aki a drenta na momento cu turistanan a cuminsa drenta, nan a laga cierto luganan caminda hopi hende por a bosha riba otro y contamina hende.

“E contaminacion ey siguientemente a plama den comunidad y awe e decision ey, pueblo ta bibando e consecuencia di dje. Awor nos por ripara cu gobierno ta tumando diferente medida descabeya y pa menciona algun ehempel ta cu gobierno siman pasa a anuncia cu nan tin intencion di introduci un ‘ley seco’ cual ta un decision ridiculo ya cu alcohol no ta duna hende corona virus y bebemento di alcohol na cas tampoco ta duna hende corona virus.

Pues si gobierno kier bisa cu e kier evita aglomeracion di hende hunto, gobierno tin cu cera barnan pero no tin sentido pa evita pa hendenan cumpra alcohol, cu ta otro medida descabeya y ridiculo y por a mira e desaprobacion den comunidad caba pa e decision aki.

Despues gobierno ta bisa cu frontera ta habri y turistanan por drenta Aruba, buelonan por yega Aruba te casi 10’or di anochi pero ta bira introduci un toque de queda caminda ta cera tur luga 10’or di anochi. Ta otro medida riciculo pa motibo cu operacion di e luganan aki ta depende riba cierto cantidad di ora y si tuma tur precaucion necesario den e luganan aki, e ora no ta importante pa e luganan cera 10’or, 11’or of 12’or, no ta problema basta ta tuma e pasonan necesario.

Un hende bay come den un restaurant, e por contamina 12’or di merdia, e por contamia 3’or di atardi y tambe 11’or di anochi pero ta haciendo como si fuera e corona virus ta un virus cu mas scur bira anochi, mas e ta ataca hende. Ta un decision y ponencia sumamente ridiculo ya cu ta kita e accento y atencion for di cosnan importante ya cu e parti importante ta cu mester bisa e ‘mondkapje’ ora un persona ta den areanan cera of areanan caminda cu tin hopi hende.

Bisti un ‘mondmask’ ora cu bo no por keda mas leu c’un meter y mei for di otro hende, percura pa tin productonan di hygiena, laba man y tene aspectonan di hybiena ora hendenan ta bay den supermercado of tienda. Tempo cu corona virus a cuminsa cu tabatin 10 caso, tur luganan grandi tin hendenan ta haci garoshinan limpi cu ta wordo usa pa shop, tabata tene areanan limpi pa preveni un contagio directo. Laga nos ta honesto, mayoria di contagio ta tuma luga na momento cu ta hala ‘particulars’ di e virus, pues si bo ta cerca di otro pero tambe si un hende pasa su man cu ta pata pata di slijm riba algo y un otro hende bay mishi cu esaki pa despues pasa su man na su cara, tambe e hende ta core riesgo di wordo contagia.

Pesey tambe ta insisti pa no duna otro man y pa constantemente laba man, pues e cosnan aki ta cosnan cu mester a sigui tuma luga pero awor cu ta mira cu corona virus ta ‘wild spread’ e tipod i advertencianan aki a stop cu nan. Awo e siman aki gobierno ta bin dilanti y bisa cu nan no a tuma cierto medidanan cu nan a anuncia pa motibo cu e cantidad di casonan di corona virus a baha pero e corona virus no a baha y no ta bahando tampoco na e momentonan aki.

Loke ta bahando actualmente ta e confiansa di pueblo den gobierno, confiansa cu ora bo bay haci un test di corona virus, cu nan no ta publica bo nomber y tira asina sin mas riba caya.

Tambe e confiasa a cay cu e testnan aki ta valioso pasobra ora c’un hende bay haci un test y ta resulta c’un hende su test ta Sali negativo y un rato despues ta bisa cu e ta positivo segun resultado di dokter y ta e cosnan ey a pone cu pueblo no ta confia gobierno mas.

Consecuentemente hopi hende ya no ta bay test mas ya cu hopi hende sa cu nan tin corona virus ya cu nan tabata den un area caminda tin un hende cu a test positivo y cu el a haya cierto sintomanan y nan tambe tin e sintomanan aki, pues nan sa cu nan tin e virus pero nan no ta bay haci test.

Tin casonan caminda tin 10 hende of mas cu a sali positivo den un cas pero ningun a bay test pa motibo cu un di nan cu a bin bishita e cas, a resulta cu e tabatin corona virus positief.

Pues niun di e hendenan aki no ta registra den lista di gobierno, pues consecuentemente gobierno no sa na e momentonan aki si corona virus ta subi of baha.

Si haci un analisis den pueblo lo haya sa cu corona virus no ta bahando y pesey ta sumamente importante pa sigui haci un apelacion riba pueblo pa tuma pasonan preventivo necesario pa asina preveni di contagia y e cos mas principal ta pa tur hende tene nan mes na e reglanan stipula, manera laba man continuamente, bisti ‘mondkapje’ keda den areanan cera y no haci bishitanan cu no ta necesario ya cu esey ta pone bo core cierto riesgonan,” Parlamentario Arthur Dowers a declara.