Pa hopi aña ta tende cu Jeugd en Zeden Politie (JZP) tin hopi trabou cual ta influencia e tardansa cu tin di investiga casonan. Tambe ta scucha hopi mal maneho di Departamento Voogdijraad den diferente sorto di caso. Poco, poco personanan den comunidad ta haci e casonan aki publico buscando oido cerca ministernan concerni pa trece cambio y husticia. Arthur Dowers minister encarga cu Husticia ta splica kico por spera y e reto cu tin.
Pa loke ta falta di personal na JZP, Sr. Dowers a bisa: “Si tin falta di personal Hefe di Cuerpo di Polis lo papia esaki cun’e (hefe di e departamento), y ta percura pa tin mas personal. Mi lo papia cun’e riba esey.”
Voogdijraad tambe ta un departamento cu ta cay bou di Ministerio di Husticia, pues a puntra Sr. Dowers kico tin pensa di haci of kico por wordo haci pa mehora e departamento. Ya cu ta hopi hende, pa hopi tempo ta critica e forma cu e departamento ta funciona. Sr. Dowers a cuminsa ta bisa cu prome e ta importante pa cada caso cu presenta wordo analisa riba su mes, pasobra cada caso ta diferente. “P’esey ora e caso aki (dos mucha muhe abusa) a presenta nos a analisa esaki y ta bay haci esaki cu mas hende den e dianan nos dilanti, pa wak specificamente kico a bay bon y kico a bay robes den e caso. Si nos bay atende cu e caso di maneho di Voogdijraad en general, e ta bira hopi dificil, pasobra cada hende ta experiencia otro. Voogdijraad ta traha basa riba e bienestar di e mucha, pero no tur ora tur hende ta di acuerdo cu locual cu Voogdijraad ta haci. Nan tin sistema cu nan ta traha y reglanan cu nan tin cu mantene y no ta tur ora nan por tene cuenta cu derecho di tur esunnan envolve, specialmente hende grandi nan, pasobra nan enfoke ta e muchanan.” Esaki principalmente ta trece hopi critica riba Voogdijraad, e mandatario a termina bisando.
A pesar di e splicacion aki duna di parti Sr. Dowers hopi ta keda cuestiona cu e departamento berdad ta traha na bienestar di mucha, mirando tardansa cu tin den atende cu e casonan.
