Adiccion pa video gaming a sigui crece den poblacion y ainda te dia di awe hende no ta conoce e magnitud di esaki. Pa aña 2011 usuarionan di video gaming no tabata yega 200.000, pero na aña 2018 ya tabatin 40 miyon.

Adiccion pa video gaming tambe ta inclui e consumo obsesivo di weganan online y otro pasatempo riba internet. Hobennan entre 15 pa 24 aña ta esunan mas exponi den problema aki. Di loke ta trata Aruba, ya fundacionnan a cuminsa papia y trece dilanti e topico aki y cu esaki algun mayornan mes a cuminsa ripara cu nan yiu ta birando adicto.

E ultimo ‘boom’ den area aki ta denomina ‘Fortnite’, un videogame cu tin mas di 45 miyon fan, cu ta traslada e bataya virtual pa casnan y scolnan. Expertonan internacional ta bisa cu e clave di e atraccion ‘fatal’ aki ta cu el a ser crea pa diseñadonan cu ta conoce hopi bon e psicologia y cu ta hiba conducta pa algo mas compulsivo y adictivo.

Durante un entrevista cu Bon Dia Aruba a haci cu Arthur Comenencia di Consultorio pa Asuntonan di Adiccion (CAA), el a splica cu ora e mucha ta den contacto cu e mundo aki, agresividad ta aumenta y interes pa scol ta cambia, loke ta causa cu e lo haya problemanan na scol y na cas tambe. E ora aki e mayornan ta yama CAA y asina por wak cu nan tin un caso di adiccion pa video gaming.

Otro efectonan cu esaki ta causa pa muchanan ta cu scol no ta algo importante pa nan, tampoco e parti social, nan ta enfoca mas riba e wega y esey ta e problema. Unabes cu un mayor ta bisa nan yiu por ehempel pa bay pa come, su reaccion ta grita e mayornan. Tambe tin casonan cu muchanan no ta sali for di camber pa motibo cu nan tin mas interes pa e wega.

Comenencia a comenta cu hopi mayornan ta yama bisando cu manera cu nan ta wak algo, ya caba nan sa cu ta existi un problema. “Unabes cu bo ta laga bo yiu cu acceso pa internet, e ta bay ta un problema” Comenencia a sigura.

Mester tin un control pa motibo cu esey por keda escala pa grandi. E problema tambe ta cu tin biaha mayornan ta reconoce esey, pero tambe ta existi algun cu no ta ripara nada te ora cu nan ta wak cu e situacion a sali for di man.

Consultorio pa Asuntonan di Adiccion ta bin promoviendo conscientisacion pa cu adiccion di gaming, pa ora cu mayornan ta wak un situacion parecido por cuminsa bati alarma den parti aki.

Tambe, Comenencia a señala cu na Aruba tin 4 caso registra di adiccion pa video gaming, den un averahe di 13 aña bay ariba. Tres di nan ta asisti pa CAA y nan ta ricibi ayudo psicologico, psico- educatie y psikiatra pa nan por haya un afspraak pa wak con por soluciona e problema.

Ademas, Comenencia a bisa cu normalmente, e procedura pa adiccion ta dura di 10 pa 12 siman. Pero adiccion pa video gaming ta algo otro, henter e proceso ta cambia.

Di mesun manera, el a afirma cu algun mucha ta bira adicto pa video gaming pa via cu nan ta sufri di bullying y esey tambe ta kita interes di bay scol. Nan ta prefera di keda na cas y hunga cu nan amigonan online, pero nan no sa e peligernan, cu nan por bira victima di un hacker of pedofiel pa motibo cu hopi adultonan tambe ta hunga.

“Gaming ariba su mes no ta malo, pero e mester ta controla”, Comenencia a sigura. E parti importante ta educacion. Mayornan tambe ta haya terapia, pa motibo cu nan tambe mester forma parti di e proceso. Por ta cu nan ta reconoce cu e problema ta existi, pero tambe nan por tin necesidad di ayudo psicologicamente.

E mayornan mester sa kico nan yiu ta hunga riba internet pa nan por tin control. Comenencia a afirma cu den temponan aki tin hopi muchanan cu ta bay riba weganan cu tin di haber cu tiramento y ora un mucha ta victima di bullying na scol, e por pensa riba esaki y den futuro por bira un ‘shooter’.

Pa finalisa, el a recomenda pa mayornan papia mas cu nan yiunan pa asina nan por sa con e yiu ta sinti, sin cu mester acudi pa un dispositivo electronico y asina mustra nan cu esey no ta un solucion pa e problemanan cu nan por tin.

Genera un ambiente di famia pa por haci otro tipo di actividad, como tambe hunga cu nan yiu pa por yuda nan crea un vision critico di wega online.