Cosecha ta e tienda di Departamento di Cultura Aruba caminda ta bende artesania autentico Arubiano. Su director, Joanne Dirksz a expresa su satisfaccion na momento cu Prome Minister Mike Eman a firma e Decreto Ministerial instituyendo e comision encarga pa otorga e Seyo Nacional di Cultura na productonan di nos artesanonan local.
“Nos tin hopi artesano cu nos ta traha cu ne caba y mi ta hopi contento cu nos a logra pa firma e MB aki. Mi sa cu tin hopi artesano cu ta wardando pa nan haya un seyo,” Dirksz a bisa. El a indica cu tin hopi producto local afo cu ta di calidad halto cu e sa cu por bende den e tienda. “Di mi experiencia mi por bisa cu tin hopi turista ta buscando productonan autentico y mi ta kere cu, cu e comision nobo nos por start fresh.”
E ta invita y un y tur cu ainda no conoce Cosecha, pa haci un bishita na e tienda cu ta situa na e edificio restaura di ex Museo Arkeologico riba Plasa Padu, patras di Oficina di Gobierno. Aki, mescos cu na Cosecha na San Nicolas, tin hopi producto cu ta varia for di pintura, obra di man, acesorio pa cas of personal, y hopi mas. Na Cosecha San Nicolas tambe tin un workshop area. `Pasa wak nos workshop area caminda tin hopi workshop boso tur por siña un tiki mas y tambe nos tin hopi artesania local na benta,’ asina e director a indica.
E Seyo Nacional di Cultura Aruba awo lo bin riba productonan di artesanonan local cu ta cumpli cu e rekisitonan di autenticidad. Pa mas informacion por yama Departamento di Cultura Aruba.
