Arte y su importancia pa muchanan

Arte ta un lenguahe cu ta aumenta capacidad di expresion di muchanan a traves di diferente elementonan; di e forma ey, creatividad y imaginacion ta fortalece y ta hunga un rol hopi importante den e proceso di aprendisahe, e dos elemento aki ta beneficia e desaroyo infantil di e muchanan.

Ora un mucha ta pinta of ta realisa otro actividadnan di expresion plastico, sin cu e mes ta ripara, e ta expresando emocion y sensacion. Ta p’esey cu arte ta un strategia pa enseñansa den tur area.

E simpel habilidadnan ey por haci un diferencia significativo den nan enseñansa, specialmente si ta cuminsa for di un edad trempan, ya cu ta duna potencia na nan desaroyo creativo, reflexion y critico.

Arte ta un forma di sinti e bida y ora ta sensibilisa pa mundo e muchanan ta bira miho ser humano. Ademas, nan ta cuminsa compronde miho rond di nan y na medida cu nan ta crece ta compronde e mundo di un manera critico y cu mas madurez.

Arte pa muchanan ta duna potencia pa nan capacidad intelectual, pero tambe e comunicacion entre mayornan cu nan yiunan for di edadnan chikito pa motibo cu a traves di pintamento, klei, incluso baile, e mayornan lo por conoce un poco mas di nan yiu.

E arte ta aumenta nan capacidad di reflexion, nan ta cuminsa pensa riba nan mes, tanto externo como interno. Ademas, ta haci pa nan pensa di resolve algun problema di manera basico, un practica cu ta yuda hopi ta ora nan ta crece y nan tin mas responsabilidad.

Aunke UNESCO a describi educacion artistico como un derecho universal di e muchanan, Organisacion Mundial di Salud a pone na evidencia e beneficionan pa salud y hopi experto y institucionnan a manifesta cu educacion artistico y cultural tin un papel destaca den aprendisahe, nan ta bira capaz di maneha dificultadnan y desaroya e tolerancia.

Pa un mucha por disfruta di arte, tin cu pone disponibel tur loke tin na cas pa e por haci’e. Pero ora nan ta mas chikito entre 2 pa 3 aña di edad ta un bon idea pa acompaña nan mientras nan ta expresa tur su arte, dunando libertad di expresion pa guia nan expresion artistico, un bon idea ta pa pone papel den e murayanan y asina nan por pinta cu mas facilidad y cu mas espacio pa crea.

Pintura como instrumento di comunicacion pa muchanan ta aumenta e acto di comunicacion cu otro hende y cu nan mes, den sentido aki ta consehabel pa nan experimenta cu nan dedenan y asina poco poco aumenta nan confiansa cu un disciplina sano creciente eligiendo e materialnan y colornan cu nan kier.

Siña tocante cualkier representacion di arte no solamente amplia nan cultura general, tambe ta aporta na e comprension di diferente cultura, epoca y sentimentonan, di e mesun forma, nan ta desaroya habilidad analitico.

Muchanan entre 0 pa 7 aña ta den un etapa hopi concreto unda nan mester cu tur cos ta a traves di nan sentidonan y un di e factor clave ta e wega, esey ta e accion principal cu mester guia e proceso di desaroyo y aprendisahe di e muchanan, kiermen, e obhetivo di tur e actividadnan cu ta relaciona cu arte mester wordo disfruta y di tin un vinculo cu otro.

Tambe ta existi exploracion, e muchanan ta gusta purba, comunica, move, un bida liber y no haci un dinamica so na cas, sino cu nan tin cu experimenta pa nan mes.

Musica tambe ta stimula, canta, baila of haci coreografia cu movemento pa evidencia e cambionan di ritmo of di instrumentonan, expresion artistico ta yuda desaroya ambos banda di celebro.

Den un sentido general, arte ta cualkier actividad humano cu ta rekeri emocion y intelecto pa crea obranan cu tin caracteristicanan mas estetico, tin relacion cu naturalesa humano y ta sinonimo di creatividad, ta p’esey cu ta importante tanto pa desaroyo como pa e conocemento.

Como terapia, arte por brinda paz, felicidad, amor speransa na e sernan humano den situacionnan unda por ehemplo, un persona mester scucha musica pa nan cura su tristesa, wak comedia di teatro pa nan hari of wak un pelicula pa siña of conoce for di e pasado.

Awe 18 di mei ta conmemora na nivel mundial e Dia Internacional di Museonan, esey tambe ta un bon idea pa mayornan hiba nan yiu e fin di siman y disfruta di loke museo arkeologico tin pa asina nan por experiencia diferente forma di arte.

“Tur mucha ta un artista, e problema ta con e lo sigui como artista despues di crece”, Pablo Picasso.