Den fin di siman a tuma luga e evento di Art Fair Aruba, cual tabata e clausura di e siman di arte, Art Week Aruba 2023. Un evento cu tabata yen di arte, moda y ambiente riba e cayanan di San Nicolas y cu tanto pueblo di Aruba como bishitantenan por a disfruta di dje.

E siman di Art Week Aruba 2023 a cuminsa ariba dia 4 di september cu un Art Talk y di eynan a sigui un siman cu diferente actividad pa tanto artistanan local como internacional.

“Cada dia tin algo diferente y creciendo cu nos artistanan y dunando mas herment pa nan crece y bira un artista mas grandi cu ya nan ta caba,” Tito Bolivar, director di Artisa y Art Fashion Aruba, a indica den un conferencia di prensa anterior anunciando e siman di arte y moda pa e aña aki.

E cayanan di San Nicolas tabata e centro di atraccion durante e fin di siman cu a pasa cu diferente aresta exhibiendo nan arte y creacionnan di tur tipo pa asina publico presente por admira.

Ademas di arte, Art Fair Ariba 2023 tabatin hopi ambiente di musica, canto, baile y poesia. Publico presenta por a disfruta di presentacion di artistanan musical local, presentacionnan di baile di gruponan di baile di Aruba y tambe un show special cu a rindi tributo na e historia di sclavitud di Colombia cu artistanan di Colombia.

Un tema cu a encaha cu e tema di Art Fashion di e aña aki cual tabata ‘Unchained: Fashion with a causa’. Bolivar a splica den su conferencia di prensa anterior cu e aña aki Art Fashion a scoge e tema aki, un tema un tiki delicado, door cu Hulanda ta celebrando 160 aña di abolicion di sclavitud. Nan a dicidi di usa e tematica aki como e tema di Art Fashion pa e aña aki cu a treciendo diseñadornan for di full rond mundo.

Cada aña Art Fashion ta busca un topico di combersacion den pueblo y den pasado nan a yega di usa temanan manera ‘Breaking the Silence’ y ‘Climate meets Fashion’, entre otro.

Reportero di Bon Dia Aruba tabatin e oportunidad pa combersa cu algun di e artistanan cu a participa den e Art Fair Aruba 2023.

Un di e artistanan a conta cu esaki ta su di dos aña participando den Art Fair. “Mi ta participando pa di dos aña caba y mi ta pensa e ta un tremendo manera pa no solamente trece bida na e cayanan di San Nicolas y mustra nos arte local, pero e ta yuda nos como artista demostra nos arte y tambe si hendenan kier cumpra nos piesanan, esey ta algo super bon,” e artista a conta.

Otro artista cu tabata presenta bendiendo su piesanan di joyas traha na man a splica cu esaki ta un bon oportunidad pa presenta y bende su creacionnan. “E ta un bunita evento. Hopi hende y hopi bon ambiente. Mi por saca e piesanan cu mi ta traha mi mes y cu suerte mi por bende nan. E ta un bon oportunidad pa nos como artista local. Mi gusta arte tambe, kiermen e ta echt hopi bon,” el a bisa.