Ayera tardi durante un conferencia di prensa, Tito Bolivar, director di Artisa y Art Fashion Aruba, a anuncia Art Week Aruba 2023. Bolivar, hunto cu miembronan di e organisacion di Art Week Aruba a elabora ariba diferente aspecto pa loke ta e siman di arte y moda cu lo tuma luga den luna di september.

Bolivar a splica cu pa varios aña caba na ta encarga cu organisacion Art Week Aruba inoficialmente. For di aña pasa nan ta bin ta informando comunidad di tur e proyectonan cu nan lo ta haciendo durante e siman di arte aki.

El a indica cu aña pasa nan a tuma e decision di rebrand y sali cu loke ta Art Week Aruba, na unda cu nan ta yena henter un siman cu arte. “Ya caba pa seis aña tras di otro, pero aworaki poco poco nos ta treciendo e mas cerca di comunidad pa comunidad sa kico por spera nan den e siman di september 4 pa 10,” el a remarca.

E siman di Art Week Aruba ta cuminsa di 4 di september cu un Art Talk. Bolivar a splica cu e Art Talk aki ta bay tuma luga na San Nicolas y lo toca temanan di branding, con pa bira un artista internacional, con un artista por posiciona su mes y kico ta e mercado cu Aruba Art Fair lo laga atras e aña aki pa tur e artistanan cu ta participa. Segun Bolivar ta indica, ya tin mas di 100 artista registra pa Art Fair.

Dia 5 di september ta bay tin tayernan di arte. E tayernan aki ta wordo duna door di muralistanan di full rond mundo cu ta bay ta na Aruba durante e temporada di Art Week y cu lo ta pintando diferente muralnan.

Bolivar a agrega cu tur aña cu e artistanan aki bin Aruba nan ta duna un tempo di nan espacio pa nan por duna back na comunidad di Aruba y siña e artistanan Arubiano con ta pinta riba muraya y con ta crece den e mundo ‘callejero’ di loke ta muralismo.

E tayernan aki ta completamente gratis y ta solamente pa e artistanan cu ta participando den Art Week. “Nos ta selecciona nos hendenan a base di e participacion y nan ta haya e espacio pa siña di nos artistanan internacional,” el a subraya.

Ariba dia 6 di september ta bay tuma luga Art Fashion Unchained: Fashion with a cause.

Bolivar a splica cu e aña Art Fashion ta scoge un tema un tiki delicado cual ta unchained. El a indica cu door cu Hulanda ta celebrando 160 aña di abolicion di sclavitud, nan a dicidi di usa e tematica aki como e tema di Art Fashion pa e aña aki cu ta treciendo diseñadornan for di full rond mundo.

El a remarca cu cada aña Art Fashion ta busca un topico di combersacion den pueblo y den pasado nan a yega di usa temanan manera ‘Breaking the Silence’ y ‘Climate meets Fashion’, entre otro.

Dia 7 di september tin un VIP dinner cu ta un cena priva y ta solamente pa 30 persona. E 30 personanan aki lo tin e primicia di Aruba Art Fair cu lo tuma luga dia 8, 9 y 10 di september den cayanan di San Nicolas.

“Cada dia tin algo diferente y creciendo cu nos artistanan y dunando mas herment pa nan crece y bira un artista mas grandi cu ya nan ta caba,” Bolivar a enfatisa.

Sra. Diana Croes, miembro di e organisacion di Art Week Aruba, a splica tocante e intercambio cultural y artistico cu Aruba tabatin, y ta bay tin tambe, cu Colombia.

“Mi tabatin e honor di a participa hunto cu e elenco di Aruba pa prome biaha den Colombia Moda. A base di nos contactonan cu ATA nos a bin haya e contacto aki cu ta alcaldia di Medellin y cu a acerca Art Fair y e organisacion di Art Fair pa nos por bay haci un intercambio cultural y di arte entre Medellin y Aruba,” el a indica.

El a sigui splica cu esaki ta encera cu Aruba ta bay tin lasonan hopi estrecho cu alcaldia di Medellin pa asina por intercambia no solamente arte, pero parti di e cultura di Aruba, intercambia artistanan, pero tambe di awo pa dilanti Aruba lo ta participando den Colombia Moda.

Croes a agrega cu ora cu ta papia di Colombia Moda e no ta solamente e moda internacional y moda di Colombia mes cu ta bini hunto, pero e ta expande na diferente localidad y Aruba a participa riba e pasarela di Medellin na unda cu hopi di e prensa internacional tabata presente y pa Aruba e tabata hopi bunita e participacion.

“E tabata un experiencia hopi grandi y durante di e experiencia aki Aruba a luci masha hopi mes y nos a wordo hopi bon ricibi pa e prensa internacional y e diseñador Giogiola Arendsz a haci un trabao excepcional na Colombia,” el a subraya.

El a splica tambe cu Aruba a logra cera un laso cu e fundacion SENA di Medellin. Fundacion SENA ta un fundacion cu ta yuda crea diseñadornan, crea modistanan y ta traha pa yuda e hendenan cu no tin trabao yega na un profesion y pa haya un trabao.

Croes a remarca cu e organisacion di Aruba Art Fair ta bay haci un intercambio na unda cu nan ta bay trata di trece Fundacion SENA Aruba pa asina nan tambe yega na un fundacion na unda cu lo organisa diferente proyectonan den futuro pa yuda esnan cu no tin trabao.

“Nos ta pone e señoranan cu no tin trabao central pa asina nan tambe por siña den fashion, pa nan por siña tambe bira un costurera profesional, pero tambe pa guianan pa yega na trabao,” el a resalta.

Fundacion SENA tambe ta bin Aruba pa participa den Art Fashion y lo ta biniendo cu e diseadornan ganador di nan comeptencia di moda.

Diseñadornan cu lo participa den Art Fashion 2023 ta inclui entre otro diseñadornan local Ronchi de Cuba, Gigiola Arendsz, Fausta Luna, Vanessa Paulina, entre otro. Y pa loke ta diseñadornan internacional, tin diseñadornan cu ta bin for di Corsou, Hulanda, Sint Maarten, Angola y Colombia.