E periodo di cuarentena aki, cu tin e obhetivo di detene e contagio di coronavirus, ta importante pa famianan biba den un ambiente positivo y di paz.

Den sentido aki, aromatherapy ta un bon opcion. Ta un terapia holistico cu ta mira un persona completo, su parti fisico, psikico, social, te su manera di come. Asina a duna di conoce Shamila Thijsen, ken a studia Reflexologie HBO Niveau y Holistisch Aromatherapie MBO na Hulanda.

Aromatherapy tambe un terapia alternativo basa riba uso di azeta esencial puro y natural saca for di wortel, taki, stam of flor pa mehora salud y bienestar. Ta azetanan hopi concentra cu ta evapora hopi lihe. Asina mes el a señala cu ta importante pa usa azeta 100% natural y no usa esunnan artificial, pa motibo cu segun Thijsen a sigura, curpa di un persona tin su energia, un aura y azeta esencial ta positivo pa e aura. Azeta artificial por causa un efecto contrario, como dolor di cabes.

Azeta esencial ta traha riba bo mente y curpa. Thijsen a comenta cu esaki ta pa via di nos sistema respiratorio, cu ta conecta directamente cu un parti di e celebro y tin influencia riba emocion y sistema psikico. A traves di e blaasnan den pulmon, e azeta esencial ta drenta den sanger.

Asina mes, Thijsen a splica cu azeta esencial no ta un remedi cu un persona por usa si tin un virus, pero e ta yuda hopi contra bacteria di beskem. Tambe por wordo usa pa desinfecta e aire, man, por usa den cushina, den man di porta. Ta importante pa menciona cu no mag di usa azeta esencial den spray puro den nanishi, pa via cu e por afecta slijmvliezen.

Na e momentonan aki di sentimentonan inevitabel como miedo y stress pa e menasa cu e virus COVID-19 ta representa pa bida di hende, ta importante pa famianan convivi den un ambiente pacifico, pa e cual nan miembronan mester ta bon cu nan mes.

Un recomendacion ta pa no pensa cosnan negativo, tin claridad mental y capacidad di mira e situacion aki desde un perspectiva mas amplio. Tuma un momento pa hala rosea di un forma largo, slow y profundo durante tres minuut y mantene e lomba straight. Esaki lo por yuda regula stress y ansiedad, ya cu e respiracion aki ta genera calma pa esunnan cu ta practica cu frecuencia y si por usa un azeta esencial lo ta miho pa por haya paz, asina Thijsen a relata.

Azeta esencial tin diferente uso como por ehempel pa haci cas limpi, ta un bon anti-grasa, tambe por usa azeta di eucalyptus of tea tree cu ta aporta un aroma fresco pa e cas, segun tambe ta yuda famia pa evita un resfriado of un grip.

Thijsen a trece dilanti cu e lo por stroba e virus den prome estadia caba prome cu e drenta e celulanan, segun un studio a wordo sigura si bo usa tea tree den un espacio chikito, cera, e virusnan ta disparce den 10 minuut y despues di 15 minuut no a haya mas virus. E estudio aki a wordo haci riba e virus di influenza no di COVID-19.

Pa finalisa, el a duna di conoce algun tipnan, como por ehempel:

  • Habon pa laba man:

Den 200 ml habon likido pa laba man neutral of uno cu lo combina cu e azeta esencial agrega: 20 gota di tea tree, 10 gota di pepermunt, 10 gota di citroen ,10 gota bergamot y 10 gota di lemongrass. Cu esaki por laba man tur dia.

  • Desinfecta cas of oficina:

Bo lo por traha un spray, cu tambe por usa riba e curpa, 100ml di Alcohol 70% , 20 gota di tea tree, 10 gota di eucalyptus y 10 gota di pepermunt of 20 gota di citroen, 10 gota di bergamot y 10 gota di lemongrass.