Tambe tin su limite …

Tin algun cos cu no ta cuadra. E partido den gobierno ta bisa cu nan ta bay cu 15 asiento sigur… Pero di otro banda afanosamente nan ta bishitando cas di hende, tratando pa nan cambia di opinion na ultimo ora, kitando bandera di otro y poniendo esun di partido berde. Camindanan di tera desatendi pa binti aña o mas di repente ta keda asfalta den par di dia, pasobra algun habitante ta priminti nan voto na e partido aki. Cosnan cu ta sucede cada cuatro aña, y no solamente cu e partido den gobierno. Interesante y importante ta: nan mester di esaki? Un dia despues di e parada di victoria, di cual nan ta bisa cu e tabata mas grandi cu e berdadero parada di victoria di 2013, bo mester ainda bay purba troce brasa di hende pa haya voto?

Aparentemente cu si. Y pa un motibo masha simpel. Nan a conta ariba cu haciendo tur e proyectonan grandi, cu ta costa centenares di miyones, y hunto como un biyon, nan lo ta gana curason di hende, pero esey no ta completamente asina. Si abo ta biba den un di e barionan ey, manera tin tantisimo, pareu bo kita for di cualkier caretera mayor, bo ta haya bo ta desea di tin un SUV hopi duro, si bo no tin un caba, pa bon motibo. Ora nan invita bo como ciudadano comun y coriente, cu no ta pertenece na e grupo di coordinador y fielnan, cu mester aparece eynan, bo no ta puntra bo mes un dado momento: y kico ami a haya? Mi a spaar añanan largo pa cumpli cu e parti di mi mes, mi a bay banco pa haya hipoteca, mi a traha un cas pa mi famia, mi debe banco dies mil ainda, y tin añanan ta warda riba gobierno haci su parti, creando caya drechi den mi bario, anto nan ta coy e placa hinca tur den un pida caminda cu un brug nobo. Costo? Casi 300 miyon, plus interes pa casi 30 aña. Y cuanto un kilometro normal di caminda ta costa? Alrededor di un miyon pa kilometro… Cu e placa di e caminda nobo y e brug cu ta cambia bo calidad di bida (?!), nan por a resolve, den ocho aña, y sin haci debe, for di presupuesto, gran parti di e problema grandisimo di tur e barionan mas nobo, unda a duna tereno, pero gobierno nunca a yega na haci su parti di percura pa un infrastructura adecua. Hopi biaha ta nos ciudadanonan mes no ta reclama esaki. Mas bien nan ta spera cu algun dia esun na mando pasa den nan bario, buscando voto na ultimo ora, pa nan haya nan ganga. Pero cuanto ta keda sin haya? Pasobra na ultimo ora, y cu e medionan limita, ta un fraccion di e alrededor di 300 pa 400 km di caya cu mester traha pa drecha Aruba den su totalidad, ta keda traha.

Y ora di vota, nos ta husga un gobierno riba e alma benevolente cu nan a mustra cu un parti chikito di Aruba, aliviando nan problema di stof, pero mientras tanto keto bay a keda sin haci nan trabao di atende henter Aruba? Y kico realmente haci bo trabao como gobierno ta encera? Atende e problemanan general, no di un grupo so. Anto como bon gobernante, bo ta bisa cu bo no ta bay nombra 400 coordinador, sigur no ora esun mita sa lesa y e otro mita sa skirbi. A gasta pa aña alrededor di 30 miyon na e fiesta di patronahe politico aki, haciendo nos prome ministro e rey di patronahe politico di tur tempo den henter Caribe Hulandes. Gobernando normal, cu un minimo di staf cu bo mester, lo tabatin placa riba presupuesto pa atende un gran parti di e problema señala, haciendo bastante mas hende feliz, inclusivo esunnan cu no a vota pa bo ainda pero cu por lo menos lo reconoce cu bo sa kico ta significa goberna drechi.

En cambio, a scoge pa malcria un grupito di hende pega na e partido, y a ignora e tareanan ‘normal’ di gobernacion. Den e sentido aki tambe nos por bolbe referi na e famoso iluminacion di bario, unda bo por haya luz solamente si bo pasa den e screening di partido den e proyecto. Ta parce cu e partido mester a pone un par di hende studia e metodonan di patronahe y intimidacion di Juan y Evita Peron na Argentina. Inclusivo e metodonan cu ta surgi ultimamente, di registra miembro, intimidacion di hende, tambe ambtenaar, pa aparece na cierto eventonan di partido. Pero tur esey ta temporal tambe. “No hay mal que dure cien años, ni cuerpo que lo aguante”, nos bisiñanan Spaño ta bisa.

Di tur manera, nos tin un sistema anticua ainda di eleccion, unda niun ser no por mira bo den e hoki ey. Tampoco esunnan cu a priminti bo algo, a cambio di algo. Bo no por bay eyden cu un celular pa saca prueba di bo voto, y esey ta bon pa bo mes. Te ey poder ta yega di esunnan, cu a opera Aruba manera un cartel den e ocho añanan aki.