Polis a detene un homber di 22 aña di edad na Arnhem cu a ofrece informacion di 12 biyon usuario y nan codigo secreto riba internet.
Usuarionan por paga y baha e informacion. Nunca antes polis no a haya un caso di tal grandura. Polis a tene entrada den dos vivienda. Den cas di e sospechoso polis a haya aparato profesional. E homber tabata ofrece e informacion via e website weleakinfo.com. E ta keda sospecha di posesion, robo y benta di informacion di usuarionan. E pregunta cardinal di polis ta unda el a haya tanto informacion.
E homber tabatin un rol facilitado den crimen cibernetico. Segun e hefe di team ‘cybercrime’ e facilitadonan tin un rol importante den combatimento di criminalnan cibernetico. No ta conoci tampoco di ken e informacion ta. Conseho di polis ta na usuarionan pa cambia ‘password’ regularmente. E detencion di e sospechoso ta resultado di cooperacion entre polis Hulandes, National Crime Agency (NCA) Inglatera, FBI Mericano y Bundeskriminalamt Alemania. Polis a haya un tip di NCA cu a keda investiga pa e team di crimen cibernetico di Oos-Nederland. Den e investigacion internacional di NCA tambe a detene un homber (22) di Norte di Irlanda. FBI a saca e website ‘weleakinfo.com’ for di aire. E investigacion ta continua.
