Minister di Enseñansa, Endy Croes den su ultimo conferencia di prensa diahuebs ultimo a trece dilanti varios proyecto cu tin andando pa cu Dienst Publieke Scholen (DPS), na unda cu den su opinion, pa varios aña DPS no tabata figura den e noticianan mucho positivo. Sinembargo, ayera e ex-minister di e cartera aki a desmenti varios punto di loke Croes a trece dilanti.
Minister Croes a sigura cu pa varios aña tin noticianan cu no ta mucho positivo pa loke ta trata DPS. Na momento cu el a tuma e cartera aki, tabatin algun rapport cu a ser haci na unda a bin dilanti inkietud, hopi trabao atrasa. El a sigura cu “nos a hereda for di minister Rudy Lampe algo no comun.
Pa esaki, Armando “Rudy” Lampe, ken tabata e persona encarga di e ministerio aki for di aña 2017 te cu aña 2021, mediante un conferencia di prensa ayera mainta a trece dilanti algun punto cu e ta considera cu ta “gañamento” di parti di e minister actual, Endy Croes, tocante varios proyecto den Dienst Publieke Scholen (DPS). E ta sigura cu “ta mi persona a inicia e proceso pa coregi e foutnan den DPS y awor minister Endy Croes ta cosecha e frutonan di mi intervencion.”
“Den e overdrachtsdocument cu mi a duna Sr. Endy Croes, ta para na pagina 8 bao di e titulo di Dienst Publieke Scholen: “Interventie DRH bij DPS, er waren diverse zeer ernstige tekortkomingen en dringende knelpunten in de HR-functie, in de uitvoering”. Mi ta suplica Sr. Endy Croes, mirando e gravedad di e problematica di asunto di personal na DPS, pa por fabor continua cu mi plan cu ta den ehecucion. Anto minister Endy Croes ta bin bisa awor cu ta su plan y cu ta ami a faya,” Lampe a señala.
Lampe a sigui splica cu for di dia 7 di januari di aña 2020, director di Departamento di Recurso Humano a mand’e un carta cu tabata cuminsa di e siguiente manera: “Naar aanleiding van het verzoek van de minister belast met onderwijs inzake de overname door het DRH van de taken van DPS met betrekking tot rechtspositionele aangelegenheden van het personeel werkzaam bij de openbare scholen, berichten wij u als volgt”. Segun el a sigura, akinan ta confirma cu ta su persona a pidi DRH pa interveni y hasta tuma over e tareanan di asuntonan di personal na DPS, mirando e caos cu tin na DPS y tabata un peticion cu el a haci.
Igualmente Lampe ta señala cu tabata dia 18 di mei 2021 cu DRH a presenta na su persona y na minister presidente Evelyn Wever-Croes e “onderzoeksrapport Dienst Publieke Scholen,” unda e ta sigura cu e rapport a mustra cu DPS no por sigui asina, cu fayonan grave, y e conclusion di DRH tabata: “zijn de binnen DPS vastgestelde problemen uitsluitend ambtelijk – en niet politiek – van aard. De leiding van DPS heeft jarenlang gefaald” y ta p’esey cu el a haci na diferente ocasion cambio den leiding.”
“Anto awor minister Endy Croes kier tira culpa riba mi persona,” Lampe a bisa.
Den e rapport aki di mei 2021 ta menciona e problema di retraso cu ambtsjubileum y kindertoelages, na unda a tuma decisionnan pa cuminsa coregi esaki, manera e ta afirma. E cantidad menciona pa minister Croes di kindertoelages ta standard, cu e tabata firma ultimo. Loke no ta klop ta e cantidad di bevordering menciona pa minister Croes, esta 300.”
Docente, cu ta gran mayoria di personal di DPS, no conoce bevordering y pa esaki, Lampe a menciona cu na edad di 38 aña e docente ta yega e maximo di su salario. Esey ta desanima docente cu ta bay Hulanda of Boneiro unda e salario ta miho. P’esey el a skirbi den su overdrachtsdocument entrega na minister Croes, specificamente riba pagina 18, cu su plan tabata pa introduci un sistema di aumento di e entrada di e docente riba 38 aña di edad. Debi na esey, el a corta vet den presupuesto pa realoca e recursonan aki aumentando e subsidio pa alumno (normbedrag) cu a drenta na vigor na 2021 y pa 2023 tabata e plan pa aumenta e entrada financiero di e docente.
Rapport di DRH di 2021 ta menciona con Lampe a introduci un leerlingvolgsysteem, digitalisacion di DPS y centralisacion di data, cu sigur mester di mehoracion, pero minister Croes ta declara cu ta su persona a bin cu nan ya cu ex-minister Lampe supuestamente no tabata sa su trabao.
Minister Croes ta bisa cu ta el a atende e witte vlek gedoe, cu segun Lampe ta un otro mentira y cu no ta trata di gedoe sino di problematiek, cu for di 2019 su persona tabata bezig cu DRH y APFA pa busca un solucion pa e problema aki, esta cu tin ambtenaar trahando pa hopi tempo caba sin cu ta inscribi pa un of otro motibo na APFA. DPS a manda DRH e lista di witte vlek 12 di maart 2020, net prome cu e pandemia, cu ta contene nomber di 55 docente afecta y dia 21 di juni 2021 el a bolbe manda un otro carta pa DPS y DRH tocante witte vlek openbaar onderwijs y su persona ta esun cu a cuminsa cu e proceso aki.
“No tin retencion di pensioen cu no ta wordo deposita na APFA, manera eroneamente minister Endy Croes a bisa. Simplemente e docentenan aki no ta inscribi na APFA. Ademas e sistema di payroll di PSA di DPS no ta permiti retene pensioen y no draag e af.” Lampe a bisa.
Di mesun manera, e ta indica cu e solucion a fondo pa DPS el a presenta asina cu el a bira minister, esta verzelfstandiging di DPS, segun e prome documento di 16 di februari di 2018, pa level e playing field entre tur schoolbestuur ta importante pone DPS bao di un stichting cu un bestuur profesional, y ta saca politica for di e maneho diario di DPS, pero na april 2018 Parlamento di Aruba a bin cu un mocion pa prohibi verzelfstandiging di DPS.
Asina mes el a keda insisti cu esey ta e miho solucion, dia 14 di september 2020 el a presenta na conseho di minister e “principebesluit om het verzelfstandigingstraject van de DPS nader te onderzoeken”. Den e rapport di 2021 di DRH tambe ta menciona e necesidad pa distancia politica di maneho di DPS y e rapport di Doorlichting di Hulanda ta exigi esey na pagina 67: “Verzelfstandig het openbaar onderwijs en brengt dat onder in een bestuurstichting”.
Tambe, na pagina 66 ta bisa cu e minister anterior a purba, referiendo na Lampe, “maar kreeg geen politiek draagvlak” y ta conclui cu independisacion di DPS ta absolutamente necesario, esaki ta parti di e landspakket, “si na 2018 ma haya politiek draagvlak awe nos lo no ta sinta cu tur e problemanan aki, parlamento y Partido MEP a faya, esey ta e berdad,” el a señala.
Esaki ta e motibo pakico segun Lampe, cu minister Endy Croes a trece malinformacion y mentira contra su persona, e ta considera cu esaki ta un strategia di marketing pa pinta ex-minister Lampe malo, debi cu ta bay bin independisacion di DPS cu tanto MEP a bringa y awor tur hende lo wak cu ex-minister Lampe ta haya rason.
“P’esey ban desvia e atencion y mustra con malo ex-minister Lampe ta. Efectivamente na final minister Endy Croes a papia cu a hire un consultancy cu lo bin cu un organograma nobo di DPS, es decir minister Endy no por pone den su boca e palabra verzelfstandiging DPS, pasobra ta esey e kiermen.” El a finalisa.
