Armando Rudy Lampe, ken te ainda ta fungi como minister di Enseñansa, Ciencia y Desaroyo Sostenibel, a duna un discurso di despedida den cual el a informa comunidad cu diaranson ultimo, dia 15 di september, el a haci entrega di e cartera di Desaroyo Sostenibel na e minister nobo di e cartera aki, esta Geoffrey Wever.

Ayera mainta algun medio di comunicacion tabata presente na Bestuurskantoor pa asina scucha loke Lampe kier a trece a dilanti, caminda el a afirma cu el a entrega tur documento referente na e cartera di Desaroyo Sostenibel for di aña 2017 te 2021.

Den encuentro entre Lampe y Wever, a bin dilanti cu na momento cu Lampe a bira minister di Desaroyo Sostenibel e no a haya nada, pa motibo cu no tabatin ni un departamento cu ta cay bao di dje, ni personal ni presupuesto. “Financieramente e no tabata sostenibel y conhuntamente cu Hulanda a dicidi pa no continua cu e protocol di cooperacion cu TNO na 2019”.

Nan a papia di e Vision Economia Circular 2050, di e cual Lampe a sigura cu el a duna contenido na loke ta e guia cu mester tin pa tur otro ministerio, y cu e desaroyo pa un economia nobo ta Economia Circular. Tambe el a bisa cu nan a yega di organisa diferente conferencia nacional y internacional riba e tema aki di Desaroyo Sostenibel, entre nan esun di Cannabis Medicinal cu a tuma luga na 2018.

Di esaki, el a menciona cu “si tin un topico cu tin relacion cu Economia Circular y Desaroyo Sostenibel pa Aruba ta e industria nobo di cannabis.”

Desaroyo Sostenibel manera a keda conoci lo cay bao di Geoffrey Wever, na unda tambe Lampe a indica cu e tambe ta bay haya e Bureau Medicinal Cannabis, “algo cu anos den e coalicion, nos no a haya absolutamente nada pa loke ta e tema di cannabis y p’esey ta na un conferencia nos por a keda, pasobra nos no tabatin ningun poder pa por a haci algo”.

Di mesun forma, el a bisa cu e ta nota e contradiccion den discurso di Gobernador durante apertura di Aña Parlamentario nobo, den cual no a menciona e tema di cannabis. P’esey e ta kere cu e bureau aki ta hopi importante pa minister nobo lucha. “E lucha ta bay sigui pa nos por realisa un pilar economico nobo akinan na Aruba y ta depende di tur e sociedad civil pa ta alerta y yega na e realisacion di algo cu no a keda cumpli ainda y cu esaki por sali for di e crisis economico”, Lampe a comenta.

Bureau Cannabis Medicinal ta bao minister di Salubridad Publico, pero su proceso di legalisacion no a termina. Ta p’esey cu tin un contradiccion eynan; y realmente pa awo e bureau aki – cu e minister di Desaroyo Sostenibel a haya pa por haci realidad e proceso di legalisacion –mester continua. “Pasobra si no e ta nace morto”, manera Lampe a bisa.

Entrega di Ministerio di Enseñansa na su proximo minister, Endy Croes

Lampe a informa cu ayera tardi e mester a entrega e cartera na e proximo minister di Enseñansa y Deporte, Endy Croes. Den esaki el a bisa cu e rapport cu el a duna na Croes su nomber ta “Mision Cumpli”, pa motibo cu en berdad tin algun cos cu no por a keda cumpli manera industria di cannabis cu el a menciona caba, y di otro banda, si “parti di mi mision a keda cumpli”. “Y mi ta haci referencia den e documento aki, e cual tambe ta bay parlamento igual cu di e otro cartera, pasobra un minister ta responsabilisa su mes na parlamento, unabes cu e yega eynan ta bira publico y prensa lo hay’e tambe”, el a afirma.

Ademas, el a trece dilanti cu for di 2003 su partido su lema tabata integridad y desde cu el a cuminsa den arena politico na Aruba, e ta sigura for di su mes cu su mision a wordo cumpli.

Tempo cu el a haya e cartera di Enseñansa, ta conoci cu el a cuminsa haci denuncia di e diferente casonan di fraude y corupcion cu tambe tabatin. Ademas di loke tin di haci cu mal gastamento di placa, mientras cu den mundo di Enseñansa ta haci falta medionan financiero.

“Loke mi a haci ta esey, coregi e foutnan ey pa e recursonan ey wordo hinca den innovacion di Enseñansa”, el a bisa.

Un di e aspectonan cu tampoco a logra termina ta e inversion den maestronan, segun Lampe a enfatisa, pa motibo cu nan plan tabata pa bin cu un maneho financiero estricto y corta malgastamento di placa cu por tini pa hinca e placa ey den innovacion den e mucha y den e maestro.

El bisa cu un maestro despues di su 38 aña no ta conoce mas aumento salarial. Pa esaki a bin un idea, pero no tabata realisabel, caminda cu el a propone un otro sistema cu el a yama ‘Premiacion pa bo Prestacion’. E ta un sistema cu cual Lampe a sigura cu el a traha den exterior hopi aña pasa.

“Esnan cu ta dedica nan tempo liber pa sigui curso, capacitacion pa bira un maestro di Montessori, nan ta haya punto den sistema y a base di esey nan ta haya un extra entrada, un toelage riba nansalario.” Pa esaki, maestronan ta entrega tur nan documentacion y cada tres aña e ta wordo evalua. Durante tres aña nan ta haya nan entrada extra, un estimulo financiero pa e maestronan dedica.

Ademas, el a declara cu ta lamentabel cu Sindicato di Maestronan SIMAR no a mira esaki. “No a mira cu mi maneho tabata pa aumenta e entrada financiero di e maestro den dado momento. Pome biaha mi ta topa un liderazgo di un sindicato cu ta contra interes financiero di su propio miembronan”, Lampe a sigura.

Di mesun manera el a informa cu nan a haya un otro carta e siman aki di SIMAR cu ta papia di intrankilidad den Enseñansa y cu nan a referi cu e maneho financiero cu Lampe a aplica pa coregi malgastamento di placa; pero cu esey ta coreccion na unda e tin cu haci lo corecto pa e por sirbi e interes di e maestro. Den e sentido aki el a splica cu el a haci lo corecto aunke el a perde su votonan y bira impopular.

Pa finalisa, el a expresa cu den e cuatro aña aki nan haci tur lo posibel pa diversifica e sistema di Enseñansa. “Aworaki niun mucha mas por keda atras, pasobra e oportunidadnan cu tin aworaki ta exclui cu tin dropouts, pasobra bo no bay scol, scol ta bin cerca bo. E innovacion a haci esey posibel” Lampe a expresa.