ORANJESTAD – Dia 9 di mei 2019, 24ora.com a publica un articulo tocante retiro ‘en bloc’ di Colegio di Curator di Universidad di Aruba. Segun 24ora.com, Armand Hessels ta un persona di confiansa di Minister Lampe cu lo por haya un posicion na Universidad of den Colegio di Curator.
24ora.com no a cumpli debidamente cu su tarea di reportero neutral. P’esey e siguiente coreccionnan.
Na prome luga Armand Hessels,desde su retiro for di Partido RED na 2010, no ta ‘un persona di confiansa’ di Minister Lampe ni di partido RED.
Na di dos luga, Armand Hessels ‘no ta haya posicion’ na Universidad of den e Colegio di Curator. Ningun hende a pidi’e y e mes no tin ningun aspiracion pa tal. Ademas, nunca e lo acepta eventual‘proposicion di ministro’ pa motibo di lo siguiente.
Segun articulo 7, inciso 2 di Ley di Ordenansa Universidad di Aruba, e Colegio di Curator ta propone candidato pa reemplasa esunnan cu a desocupa nan luga. Minister no ta mete den e parti aki. Intencion di e ley aki ta pa evita metemento politico den asunto di Universidad. Eliminacion di metemento politico den cualkier organisacion ta hustamente un di e metanan principal di Armand Hessels como presidente di Fundashon Gobernashon di Calidad Aruba (FGCA).
