Den edicion di Bon Dia Aruba di 18 di mei ultimo, partido MEP a fulmina riba mi persona como presidente di Fundacion pa Bon Gobernacion (SDBA). Motibo ta e cartanan cu SDBA a manda pa ministro di Integridad cu algun pregunta tocante asunto di (posibel infraccion di) integridad.

Primeramente SDBA ta comenta cronologicamente riba e puntonan cu MEP a trece dilanti.

BIA ta e instituto principal pa promove integridad den aparato gubernamental cu Prome Minister (PM) a propaganda for di principio di su prome gabinete. Por cierto un iniciativa hopi importante. A crea e oficina Bureau Integriteit Aruba (BIA), pero… despues di mas di 5 aña cu a propaganda e oficina aki, ainda no a percura pa aproba e ley necesario pa e oficina funciona legalmente. Como tal BIA no tin e autoridad legal (ainda) pa opera independientemente locual por duna e impresion cu ta mas bien cuestion di ‘window dressing’…

Mescos ta conta pa ley di Corporate Governance (Code). Esaki tambe ta un bon iniciativa, pero tanten cu no a legalisa e ley mes manera te ainda ta e caso, por papia di un bon iniciativa so. Lo duna mas confiansa di e intencionnan di gobierno al respecto si, preparando pa e legalisacion oficial di e ley, lo a actua segun e espiritu di e ley. Sinembargo, esey ta parce di no ta e caso, tumando na cuenta con a nombra ‘hende di confiansa’ como director (p.e. Utilities) of den hunta di Comisario di entidad importante (p.e. WEB) en bes di hiba e procedura adecua manera describi den e Good Governance Code.

Mescos ta conta pa resultado final di e Comision pa independisacion di nos institutonan halto di estado, algo cu mester a tuma luga varios decada pasa caba y di locual mi ta spera cu e no ta keda den e fase di comision so, mescos cu ta e caso di e comision pa renoba ley di Comptabilidad cu tin decada caba den man di ‘comision’.

 

Introduccion di Ombudsman ta un tema cu na Aruba como unico pais den Reino ta existi pa hopi decada caba sin solucion, cu tambe mi ta spera cu por fin lo yega na algo concreto.

Aunke tin duda (ainda) tocante efectividad di ley di screening y integridad di minister, sin mas e iniciativa ta un mehoracion compara cu e situacion anterior cu insuficiente criteria p’esaki.

Introduccion di e Wever-Croes norm a bin bao di insistencia/presion di Hulanda pa pone un fin na e compensacion financiero exagera pa (varios) director di entidad (semi-)gubernamental.

Gobierno di Aruba NO a contribui financieramente cu Afl. 100.000,- na e ‘National Integrity Scan’ (NIS), cu a tuma luga riba iniciativa di SDBA. Gobierno a pidi Hulanda permiso pa destina Afl. 100.000,- di e ‘restgelden’ di parti di Hulanda den e Fondo Desaroyo Aruba. Hulanda a duna permiso pa destina e suma aki pa e Proyecto di NIS. Pues, gobierno di Aruba mes NO a paga ni 1 cen preto pa e estudio aki!

Segun MEP, a base di e iniciativanan aki di parti di PM “e atakenan di Hessels sigur no ta na su luga!” Esey ta un postura no-corecto di parti di MEP. Mester ta cla cu e calidad di gobernacion pa 3 decada tabata hopi dudoso, irespecto e color politico. Patronahe politico na gran escala, un administracion financiero structuralmente deficiente, hopi duda tocante integridad y falta di transparencia den proyecto di gobierno, negligencia pa hiba un gobernacion drechi, etc. Tur esaki tabata e causa principal di e debe gigantesco y practicamente impagabel cu pueblo di Aruba mester paga den e decadanan binidero. Ya caba e interes so ta suma na Af.300 miyon pa aña, locual ta mas cu henter e presupuesto di e departamentonan mas grandi di gobierno, manera di enseñansa y husticia. No ta por nada cu SDBA a manda un carta pa ministro di Integridad cu e peticion pa Gobierno ofrece su disculpa pa e manera con a goberna Aruba pa decada y su consecuencianan pa pueblo. Pasobra si no, pueblo no por tin ningun confiansa cu Gobierno ta serio pa mehora su forma di opera. Lamentablemente, te dia di awe, ministro di Integridad/gobierno no a duna ningun reaccion riba e peticion aki ni riba e otro cartanan cu a entrega, manera esun tocante e asunto di LNG.

Enfoke di gabinete Wever-Croes 1-2

Gabinete Wever-Croes-1 tawata hopi consciente di e mal calidad di gobernacion cu a hiba anteriormente durante decada y p’esey a pone como su puntonan di enfoke: bon gobernacion, transparencia y integridad. Algo cu SDBA varios biaha a aplaudi publicamente. Pero…esey NO ta nifica cu automaticamente MP/gobierno di MEP ta haya inmunidad y/of impunidad pa tur su actonan. E hecho cu ami semper por a traha den bon cooperacion cu PM, y cu den nos ultimo encuentro PM a gradici mi pa e “vigilancia riba gobernacion durante casi 30 aña”, NO kier men cu ta/por keda sin critica/menciona posibel acto di mal gobernacion. Y exactamente esey ta locual SDBA a haci. SDBA ta observa y analisa calidad di gobernacion SIN consideracion di partido of persona. Ta analisa cierto incidencia a base di criteria di bon gobernacion y ta informa esnan envolvi pa medio di e actornan indica. Den e caso aki (segun e carta tocante e caso di LNG) a informa ministro di Integridad y Parlamento y a pidi ministro di Integridad pa tambe analisa un k’e otro segun criteria di bon gobernacion SIN cu di un of otro manera SDBA a entrega algun keho cerca p.e. Ministerio Publico! Como cu ta trata di funcionario publico, a informa tambe comunidad di Aruba cu al fin y al cabo ta carga tur consecuencia di tur acto di gobernacion.

E hecho cu MEP ta husga e proceder aki como uno basa riba “mentira y falta di respet” ta indica claramente cu MEP no a compronde contenido ni meta di e carta, ni di su propio “lucha pa integridad.” Recientemente a bira hopi cla cu corupcion no ta mara na un solo partido of na cierto persona so. Esey mester ta un advertencia serio pa MEP cu integridad den gobernacion ta rekeri un vigilancia continuo, irespecto e color politico. Pues, en bes di critica e iniciativa di SDBA, MEP lo mester a gradicie pa asumi e responsabilidad cu su propio parlamentarionan a neglisha. Ademas MEP mester puntra su mes:

Con bin cu un contrato asina grandi cu consecuencia profundo a keda scondi pa parlamento?

Con bin cu a involucra solamente famia y miembro di oficina di abogado ayega den e negoshi biyonario aki? MEP tambe lo a keda keto y ataca SDBA na mesun manera si tabata trata di e mesun negoshi aki pero cu famia di Mike Eman so y oficina di nan abogado ayega envolvi?

Y si MEP ta asina pro-integridad, pakico ta opone na haya mas informacion tocante e POSIBILIDAD(!) cu tin un suma substancial di finder’s fee envolvi? Of pa MEP esaki ta totalmente aceptabel como cu ta trata di exponente di MEP so? Cu otro palabra: ta menciona y investiga cos robes solamente si ‘e otro partido’ ta envolvi?

Con MEP ta cualifica e postura di Ministro di Integridad y di Economia, hunta cu e parlamentarionan di Raiz, cu a distancia nan mes for di e negoshi aki? Pakico e motibo di esaki (tambe!) a keda scondi? Acaso nan tambe a haci esey a base di mentira?

Den su articulo, MEP ta acusa mi di a perde respet pa PM y Sr. Hendrik Croes. Djis pasobra a menciona e ‘POSIBILIDAD’ cu aparentemente aki ta trata di un caso serio di nepotismo? Con MEP lo a cualifica exactamente mes un situacion pero cu esnan di AVP envolvi?

MEP ta enfoca tur su furia riba mi persona cu grito emocional sin NINGUN argumentacion. Esey ta forma parti di e sistema tradicional di hiba politica, esta pa descualifica un persona personalmente a base di e ‘cultura di miedo’. Esaki por cierto ta un instrumento hopi popular y pues hopi usa pa organisacion criminal.

Di otro banda MEP no ta haci ningun esfuerso pa analisa di berdad kico a trece dilanti pa mira con pa mehora eventual fayo den gobernacion. Pasobra no ta mi persona so a keda babuca cu e acuerdo di LNG. Den e ultimo aña, mi no a tende NINGUN exponente for di e mundo comercial, sindical, financiero, etc. cu a husga e acuerdo di LNG como algo ‘no-sospechoso’. Pues, cerca masha hopi hende ta existi hopi duda tocante e acuerdo, pero e cultura di miedo cu politico a crea y mantene bibo cu hopi exito, ta logra un silencio total for di comunidad al respecto. E falta total di transparencia, acepta sin mas pa parlamento, sigur a hunga un papel importante den esaki.

P’esey ta consehabel pa MEP duna un instituto neutral e tarea pa sondea e opinion di pueblo al respeto y/of pa entama un encuesta parlamentario al respecto en bes di para grita so a base di emocion.