Un arma intercontinental nobo cu por bula 27 biaha velocidad di zonido a bira operacional ayera, segun minister di Defensa Ruso a reporta na presidente Vladimir Putin, reforsando e capacidad di atake nuclear di e pais.
Putin a describi e vehiculo di deslice hipersonico Avangard como un tecnologia vanguardista comparabel na e lansamento Sovietico di e prome satelite na 1957. E arma Ruso nobo y un sistema similar cu China ta desaroyando a crea problema cu Merca, cual ta evaluando estrategianan di defensa.
A lansa Avangard riba un misil balistico intercontinental (ICBM), pero a diferencia di un ‘warhead’ misil regular cu ta core un ruta predecibel despues di separacion, e por maniobra den atmosfera na caminda pa un obhetivo, haciendo e hopi mas dificil pa intercepta.
Minister di Defensa, Sergei Shoigu a informa Putin cu e prome unidad di misil ekipa cu e vehiculo hipersonico Avangard a drenta servicio di combate.
Hefe di Forsa Strategico di Misil, gen. Sergei Karakayev, a bisa durante un yamada cu a pone Avangard den servicio cu un unidad den region Orenburg den montaña sur Ural.
Putin a desvela e Avangard entre otro sistema di arma prospecto den su discurso nacional na maart 2018, notando cu su habilidad di haci maniobra skerpi na caminda pa su obhetivo lo haci defensa di misil inutil.
E lider Ruso a nota cu a diseña Avangard uzando materialnan compuesto nobo pa soporta temperatura di hasta 2mil grado Celsius resultando di un vuelo a traves di atmosfera na velocidad hipersonico.
Cuerpo militar a bisa cu Avangard ta capaz di bula 27 biaha mas lihe cu velocidad di zonido. E ta carga un arma nuclear di hasta 2 megaton.
Putin a bisa den pasado cu Rusia mester a desaroya Avangard y otro sistema prospecto di arma pa motibo di esfuerso Mericano pa desaroya un sistema di defensa di misil cu el a bisa lo caba cu disuasion nuclear di Rusia. Moscu a rechasa e declaracion Mericano cu su escudo di misil no ta pa combati e arsenal di misil masivo di Rusia.
E siman aki, Putin a enfatisa cu Rusia ta e unico pais cu arma hipersonico. El a nota cu pa prome biaha, Rusia ta lider mundial den desaroyo di henter un clase nobo di arma, a diferencia di pasado ora tabata purba alcansa Merca.
Na december 2018, a lansa Avangard for di base misil Dombarovskiy den Ural y exitosamente a dal un obhetivo na Kura na Kamchatka, 6km leu.
