E grupo di habitantenan di Sero Colorado cu no ta di acuerdo cu e construccion di e hotel Secrets of Baby Beach a indica a traves di un comunicado di prensa cu nan por respeta e conseho di Welstandcommissie riba e proyecto Secrets pasobra e arkitecto di e proyecto a forma parti di esaki tambe y ta crea un conflicto di interes.

Segun e habitantenan di Seroe Colorado a informa, nan no ta acepta e evaluacion di Welstandcommissie riba nan obhecionnan contra e proyecto di Secrets of Baby Beach.

Esaki, nan a remarca, pa motibo cu Welstandcommissie no ta obhetivo ya cu e participacion di e arkitecto di Secrets den e proceso di evaluacion di e obhecion di habitantenan ta kita tur confiansa den e proceso cu a tuma lugar. Ademas nan a agrega cu na mesun momento kita tur confiansa den cualkier otro commission di Welstand apunta di parti di Gobierno pa evalua e proyecto aki.

E grupo di habitante ta señala cu esaki ta e prome biaha cu e commission di Welstand ta duna un rapport ariba e proyecto di Secrets of Baby Beach. Nan a subraya cu como cu e arkitecto di e proyecto a forma parti di e Welstandcommissie, e tabata envolvi den e deliberacion riba e obhecionnan di e habitantenan y na mesun momento a traha riba e conseho. Conseho cu a bai pa Minister di Infrastructura y cu a wordo accepta tambe.

Nan ta enfatisa cu tur esaki a sucede mientras cu e propio ley di Aruba no ta permiti pa un miembro di Welstandcommissie pa traha riba un conseho di obhecion, ora cu ta trata di su mesun proyecto. “Pues, Minister a tuma su decision abase di un conseho cu no tabata obhetivo,” nan a resalta.

“Habitantenan como tal no por acepta esaki tampoco, pasobra aki ta papia di un conflicto di interes hopi serio. Pasobra ta obvio cu nunca e arkitecto lo delibera negativamente ariba su mes un proyecto y duna un conseho obhetivo ariba e obhecion di e habitantenan. Esaki ta kita tur e balor di e obhetividad di e rapport y seriedad pa cu e obhecion di e habitantenan,” e habitantenan a remarca.

E grupo ta conlcui cu na ningun momento a habri e deliberacion pa atende cu e obhecionnan y adapta e proyecto abase di e puntonan cu nan a trece pa dilanti. Locual a ser haci, nan a señala, ta desbarata sin mas e obhecionnan formula, y como tal, esaki no a trece trankilidad, ni tampoco a habri caminda pa e partidonan por yega na otro, basa riba derecho di habitantenan como ciudadano.

Ademas di esaki, nan a agrega. tampoco no ta para e construccion manera ley ta stipula den articulo 59 di Bouw en Woningverordening. “Pa tal motibo no ta keda e residentenan ningun otro opcion cu ta pa bolbe bay Corte, pa asina forsa e Gobierno pa mantene na ley,” nan a subraya.

Nan a splica cu Corte mes a indica cu e simple hecho cu un obhecion, articulo 59 di Bouw en Woningverordening, ta forsa Gobierno pa para cualkier construccion, cual na e momento nan aki, nan ta bisa, no ta tumando lugar siendo cu Gobierno ta na altura cu e habitantenan a entrega obhecion contra e ultimo decision di Gobierno.

Dia 7 di juli ultimo un Hues Administrativo, mr. de Haseth, a dicta den su veredicto cu Gobierno mester atende cu obhecionnan di habitantenan di Sero Colorado prome cu e proyecto di Three Rivers por continua. E grupo di habitantenan di Seroe Colorado a entama casonan contra e proyecto di Three Rivers y dia 7 di juli ultimo a bolbe haya rason di hues cu ‘Secrets’ no ta cumpli cu tur exigencia di bienestar (welstand).

Esaki ta nifica cu Minister pa Asuntonan General, Innovacion, Organisacion Administrativo, Infrastructura y Ordenanza Espacial mester tuma e obhecion contra e permiso di construccion di e cambernan y bin cu un decreto nobo teniendo cuenta cu e exigencianan minimo aki, segun hues.

E grupo di habitantenan tin dos aña bringando e punto aki den Corte caba. Den luna di mei di 2020, Minister a duna Three Rivers permiso pa construccion di un hotel na Sero Colorado. Despues di a ricibi obhecion di e habitantenan, gobierno a saca un decreto dia 9 di Maart 2021, indicando cu e grupo no ta admisibel pa entrega obhecion. E habitantenan a haya toch rason di Corte di LAR dia 9 di Februari 2022 bisando cu nan tin tal derecho basa riba nan argumentonan y a destrui e decreto di gobierno. Den e sentencia ey di 9 Februari 2022 a instrui e Minister pa tuma un decision nobo basa riba e obhecion di e habitantenan.

Ariba 5 di mei 2022 y contra decision di corte, Minister a bolbe decreta cu ta considera cu e obhecion di e habitantenan contra Secrets no tabata admisibel y no a tene cuenta cu loke corte dicta. Minister a apela e sentencia di 9 di Februari 2022 na Hof y dia 24 di Mei 2023 Hof a confirma e decision di Corte y a sostene e sentencia di corte comun cu Minister a frustra e obhecion di habitantenan y cu Minister mester tin cu saca un decreto nobo y tene cuenta cu obhecion nan di habitantenan.

Ayera Prome Minister a informa a traves di un video publica ariba e pagina di Facebook di Gabinete Wever-Croes cu el a reuni cu desaroyadornan y inversionistanan di e proyecto di Secrets.

Prome Minister a indica cu manera ya caba menciona un parti di e proyecto aki ta wordo bringa den corte.

El a ratifica cu Gobierno semper a sostene e proyecto aki ya cu nan “ta kere cu e ta bay cambia full e dinamismo di e desaroyo economico di San Nicolaas y di Aruba.” El a menciona cu e proyecto por trece hopi cupo di empleo, speicalemnte pa esnan cu ta biba pariba di brug. “E desaroyo cu nos ta busca pa Aruba ta un desaroyo balansa pa tur hende por sinti e progreso y bienestar di e pais,” Prome Minister a remarca.

Por ultimo el a indica cu e reunion a bya bon durante cual nan a trece nan puntonan pa dilanti y e inversionistanan tambe a trece nan puntonan pa dilanti, como tambe nan preocupacion pa loke ta e ultimo desaroyonan di e proyecto.

“Nos a sigura nan cu Gobierno ta kere den e proyecto aki y Gobierno lo sigui haci su maximo esfuerso pa e proyecto aki por bira un realidad,” el a finalisa.