Arkeologonan a descubri e restonan petrifica di un cabay cu harnas y siya den un villa antiguo den un suburbio di Pompei.
Hefe di e parke arkeologico di Pompeii, Massimo Osanna, a conta e agencia di noticia Italiano Ansa cu e villa tabata pertenece na un oficial halto di ehercito, posiblemente un general, den e tempo ey di e imperio Romano.
Osanna a bisa diadomingo pasa cu e restonan di dos o tres cabay tambe a keda descubri. E terasanan di e villa tabatin bista riba e Bahia di Napoli y e isla di Capri. E area a ser descubri y investiga na aña 1900 pero despues a cera e tereno atrobe poniendo e material na su luga.
E erupcion volcanico di Vesuvius a destrui e floreciente ciudad di Pompei, cerca di loke awe ta Napoli, na aña 79. Osanna ta bisa cu e shinishi sofocante o dampnan herbiendo a mata e cabaynan. E ta spera cu e villa lo eventualmente keda habri pa publico.
