Como parti di e entrevista cu dr. Arjen Alberts, den e edicion aki, a papia tambe specificamente di e posicion di nos florin, en vista di nos reservanan di divisa cu no ta conta mas cu contribucion di turismo.
Realidad Covid y florin
Alberts: “Na momentonan aki, e recuperacion turistico ta hopi abao y no ta produci suficiente pa cubri e gastonan publico. Consecuentemente gobierno a dicidi pa presta riba mercado local.” E economista ta bisa cu e paso aki ta di gran peligro pasobra ta bay trece mas placa den circulacion sin cu tin dollar ta drenta. Esey ta significa cu dentro di algun siman, ni luna, florin lo perde su valor contra e dollar. Ya lo no por wanta e 1.79 florin pa dollar. “Y unavez cu bo perde esaki bo no ta hay’e nunca mas. Esaki lo significa cu e clima di inversion ta kibra pa semper y Aruba ta bira un pais di tercer mundo. Mi no sa si ta comprende esaki. E ta economia na nivel di HAVO.”
Si ta presta den moneda stranhero, den caso cu China of otro pais asina lo ta dispuesto pa haci tal, lo por wanta valor di florin. “Banconan mes no por busca e placa internacionalmente, pasobra Aruba no tin un bon credit rating, pues e ta significa inflacion. E ta mescos cu si gobierno ta saca placa di Banco Central y ta laga print placa. Economicamente e ta mesun cos. Locual ta sigui su tras ta inflacion.”
Reserva divisa
Keda fia pa cada dos luna, ta crea placa cu no tin. Pasobra Aruba no tin hopi luna di reserva di divisa. Den e mihor tempo por a yega na cinco luna. E average ta tres luna. “Pero e areglo di tres luna di reserva di divisa ta pa paisnan cu tin produccion propio y tin reserva en caso ta importa. Nos no tin economia propio. Tur cos cu ta drenta ta sali na divisa. Ta den un rato ta pasa door di e reservanan aki. Nunca e reservanan tabata suficiente. Pero nunca prome tabatin un crisis asina grandi tampoco.” Alberts a bisa cu Corsou tambe ta den e mesun posicion aki cu Aruba, y cu netamente St. Maarten debi na e desaster di horcan, ta mas fuerte para. “St Maarten ta rico na divisa. Aruba mester gana su divisa pa medio di exportacion (di servicio) y esaki ta para.”
Florin lo perde valor permanentemente
E ta un scenario cu poco Arubiano a realisa cu por sucede na Aruba, esta cu no tin suficiente divisa y cu dollar ta bira mas caro. Consecuencia ta cu Aruba tambe lo conoce un mercado preto di dollar cu tin un cambio diferente cu esun oficial. “Hende ta kere cu ta pasobra cos a bay bon pa 40 aña, cu e balor di florin ta keda igual na 1.79. No, e ta trabou pisa pa wanta e balor. Mi ta haya straño cu Banco Central no ta grita mas duro. Si ta hinca miyones den economia local ta duna hende poder di compra, pero no ta bin dollar a cambio. Lo bin un daño permanente y mi tin miedo di esey. E inflacion aki ta netamente locual Banco Central di Aruba tabatin miedo di dje. Banco Central mester a conseha Gobierno pa unicamente haci prestamonan na dollar of euro pa evita un situacion peligroso asina.” Riba dje, otro analistanan ta mustra cu door cu Gobierno ta tuma tur e liquidez di banconan, ora cu economia mehora, inversionistanan local lo no tin suficiente acceso na fondonan pasobra hopi lo ta mara na gobierno.
