Gobernador di Aruba a nombra Arie Swaen, abogado y ex
presidente di Raad van Advies, como informador.
Diahuebs pasa gobernador Alfonso Boekhoudt a reuni cu sr. Swaen y tene un combersacion a base di e consehonan for di e periodo di consulta. Na e momento ey el a pidi sr. Swaen pa bira e informador y sr. Swaen a acepta, asina gabinete di gobernador ta informa den un relato.
Ayera sr. Swaen a cuminsa oficial asisti pa secretaria Hellen van der Wal, kende tambe ta e secretaria di Raad van Advies actualmente. E informador ta ehecuta su tarea independientemente y ta tene e Gobernador na
altura di su trabou y progreso. Fin di otro siman ta spera un relato provisorio caba cu mester conduci na un relato final.
Manera di custumber e Gobernador a duna e informador e tarea pa haci un investigacion. Esaki ta basa riba e temanan mas importante cual a sali for di e combersacionnan di consulta. Nan ta:
- Garantisa un financia publico sostenibel y sano.
- Bahamento di e debe nacional, si mester, pa medio di refinancia e debenan.
- Crecemento autonomo di gastonan social y di cuido pa motibo
di vergrijzing y aumento di malesanan cronico. - Pagamento di pensioennan awor y den futuro.
- Un sociedad sigur y sostenibel a base di norma y balor.
- Reforsa organonan di control y supervision.
- Elimina burocracia pa comerciantenan y ciudadanonan.
- Implementa y garantisa un gobierno transparente
- Implementa good governance den gobierno.
E Gobernador a pidi e informador pa asina yega na un gabinete cu tin un base mas amplio posibel den parlamento riba corto plaso. Y
investiga si ta deseabel pa haci un investigacion conduci pa un of mas organisacionnan neutral y internacional riba con ta para cu e
financia y good governance di nos pais.
Pa asina preveni ‘politisacion di cierto escogencianan necesario y medidanan’. E Gobernador a expresa esaki como cu e ta tene cuenta cu Aruba mester tuma cierto escogencianan drastico riba termino cortico pa asina den futuro cercano nos por keda cu un economia y sociedad sostenibel y solido.
