Ariana Lake ta un hoben di 16 aña di edad cu desde un edad hopi jong ta activo den baile. E ta describi su mes como un hoben cu gusta lesa, baila y cushina. Den un entrevista cu Bon Dia Aruba, Ariana ta conta di su infancia, su experiencia como bailarina y con su experiencia den e mundo di baile a yud’e desaroya den diferente aspecto di su bida.

Ariana ta conta c e tin hopi memoria feliz, hopi cos cu e tabata gusta. Un di nan cu e tabata gusta hopi di tempo e tabata chikito ta cu e tabata sali tur dia pasobra tur dia e tabatin un actividad.

El a sigui conta cu otro cos cu e tabata stima di su infancia ta con cerca di otro su famia tabata pasobra semper ora cu tabatin un celebracion, semper tur hende tabata yega na su cas y tur hende tabata come y hunga.

Actualmente Ariana ta den examen klas HAVO na Colegio Arubano. Despues di gradua for di Colegio Arubano e ta bay haci AFY (Academic Foundation Year) na Universidad di Aruba pasobra e no sa ainda den ki direccion e kier sigui studia.

Cu AFY, el a splica, e tin e oportunidad pa purba diferente carera y asina por wak kico e gusta y kico e lo kier sigui studia. Tambe e ta tuma e oportunidad pa mehora y hisa e nivel di su conocemento den Hulandes pa ora cu e tin cu bay Hulanda

“Mi ta un perfeccionista y mi kier tin e fundacion ey bon pa ora mi bay Hulanda mi no mester lucha cu e cosnan ey. Esey ta mi siguiente stap,” el a bisa.

Ariana a cuminsa baila cu 6 aña. Su prome experiencia den baile tabata un tayer di ballet y baile folklorico Venezolano. Durante dos aña el a baila den e grupo di e consulado di Venezuela y despues di esey el a drenta e grupo di baile Kids & Youth in Action na unda ya caba e tin ocho aña ta baila.

E ta conta cu un di su mutilacionnan pa cuminsa baila tabata pa pasa bon y conoce mas hende y ora el a drenta Kids & Youth in Action el a drenta pa siña mas diferente tipo di baile.

Ariana ta un hoben cu tin un figura mas yen, y pa algun persona su tipo di curpa no ta apto pa baile. Pa Ariana esaki un tempo tabatin un impacto den su bida pa motibo cu e tabata sinti exclui den algun aspecto.

“Exclui den sentido cu door cu mi ta yen mi no por a haya cierto paña. Por ehempel si e otro muchanan tabata bisti saya cortico y blusa sin manga, ami a tabata haya saya largo of blusa cu manga pasobra ami no tabata mustra bon den e paña manera e otro bailarinnan. Of door di mi peso mi no por a presenta na un show of na un evento pasobra mi no tabatin e figura cu nan ta desea,” el a remarca.

Esaki, el a agrega, ta cos nan cu tabata traha hopi riba dje y tabata baha su confiansa full. “E ta algo cu mi no ta desea pa ningun hende.”

Pero di otro banda e experiencia ey a yud’e mehora den otro aspecto. El a sigui conta cu door cu e tabata sinti exclui, e mester a traha mas duro y train mas duro pa e por a demostra cu e tambe por, sin importa su peso, cu e tambe por baila mesun bon of miho cu e otro muchanan.

“E ta algo cu a haci mi cu awo, añanan despues, mi ta un di e bailarinnan cu sa tur e bailenan, mi sa kico ta trece actitud, mi sa kico ta anima publico, mi sa kico ta train duro pasobra si mi no gara algo mi ta keda train na mi cas te ora cu mi gar’e. Esey tambe ta algo cu a yuda mi realisa, personalmente, cu abo ta kies kico bo ta laga afecta bo. Abo ta dicidi,” el a expresa.

Pa Ariana baile tabata un vehiculo di enseñanza cu a yud’e desaroya otro aspectonan di si bida. Baile a yud’e ta mas responsable y disciplina, el a siñ’e con pa ta un lider y su prioridadnan.

Den e aspecto di siña ta un lider, el a splica, cu e la yud’e pasobra e ta haya e oportunidad pa siña coreografia na otro muchanan cu ta mas chikito cune y asina e ta haya e responsabilidad y e mester sa tambe con pa papia cu e muchanan, e tin cu sa con pa demostra y ta un ehempel pa otro nan.

Esey, el a enfatisa, a refleha back den su estudionan. Por ehempel na momento di haci proyectonan den grupo, hopi biaha su compañeronan ta wak e como un lider y esaki el a siña danki na su experiencia den baile.

Den e aspecto di disciplina tambe el a siña hopi. El a siña cu e mester ta consistente, bay tur training, bay tur show y train duro te ora e gara e bailenan.

Pa loke ta e aspecto di prioridad, el a splica cu baile a yud’e determina unda su prioridadnan ta. “Si mi tin un examen y mi no a caba di leer, mi tin cu wak cu si mi scol ta mi prioridad, e ora mi sa cu pa e dia ey mi no por bay train of show pasobra mi tin cu studia pasobra mi scol ta mi prioridad number uno. E ora mi sa cu mi mester prepara miho pa e siguiente training.”

Por ultimo, Ariana su mensahe pa hubentud ta: “Loke ta pa bo ta bay bin pa bo, por ta bo no a haya loke bo tabata kier, pero esey ta pasobra e no tabata pa bo, tin algo eyfo cu ta miho pa bo. Abo ta bay wak kico bo ta laga afecta bo. Por ta nan a haci of bisa algo cu bo no a gusta. Abo ta dicidi si bo ta bay sinta bira tristo of si bo ta dicidi di laga loke nan a bisa of haci ta irelevante pa bo. Abo ta e persona cu ta duna balor na loke otro hende a haci of bisa y abo tambe ta dicidi kico bo ta bay haci cu esey. Lag’e ta un motivacion pa demostra bo mes y otro hendenan cu abo si por.”