Ariana Croes ta un hoben di 17 aña di edad cu tin un trayectoria largo den e deporte di rhythmic gymnastcis. Aworaki e ta preparando pa ta e prome representante di Aruba na Campeonato Suramericano di Rhythmic Gymnastics cu lo ta tumando luga e luna aki na Barranquilla, Colombia. Den un entrevista cu Bon Dia Aruba e ta conta di su bida como un atleta dedica na e deporte aki, su preparacion y plannan pa futuro.

Ariana a cuminsa practica ballet cu apensa tres aña di edad. Cu shete aña el a cuminsa practica artistic gymnastcis y depsues su coach Adriana Sevilla a escoge Ariana pa drenta e seleccion di rhythmic gymnastics y desde e tempo ey e ta forma parti di e seleccion aki.

E ta conta cu su preparacion pa competencianan ta bastante intenso. “Ora mi tin competencia, manera e competencia cu mi ta bayendo aworaki den october, mi ta train mas hopi. Den vakantie di zomer mi a train mainta y atardi. Aworaki mi ta train mainta y atardi tambe, dus ta hopi ora,” el a remarca.

Ariana ta bishitando Colegio Arubano y ta den examen klas di Havo. E mester dividi e oranaa den e dia y balansa su trainingnan cu su trabao di scol. E ta conta cu den siman ora cu e tin scol, e ta train di 3or di atardi pa 7or di anochi. Ora cu tin CP of examen tin biaha e mester wak bon ki dianan e por train y ki dianan e mester bisa e no por train. “Pa materianan cu mi tin un tiki dificultad cune mi ta sigura pa mi no train e dia ey,” el a bisa.

El a agrega cu e ta purba di haci tur su lesnan y huiswerk na scol mes enbes di warda te ora e yega cas pa haci’e pasobra e no ta bay tin tempo. Y den caso cu e no logra caba, despues di training e mester caba cu su cosnan di scol.

Ariana ta e prome atleta cu lo ta representando Aruba den e categoria di rhythmic gymnastics den un nivel asina halto, nivel senior.

“Mi ta hopi emociona. Mi ta trahando pe full e aña aki. Esaki mi kier haci e aña ki y mi ta hopi emociona. Tambe mi ta bezig ta wak e competencia como un preparacion pa proximo aña, pasobra otro aña nos tin algun meta cu nos kier logra,” el a subraya.

El a splica cu e ta bay competi cu tur aparto di rhythmic gymnastcis pasobra den e nivel senior nan mester competi cu tur aparato. E nivelnan prome cu senior sa haci dos of tres aparato, nan no mester haci tur. Den su caso e ta bay haci e cinta, e clubs (mazas), e aro (hoep) y e bala.

Pa loke ta trata su bista ariba futuro y e plannan cu e tin pa loke ta practica y competencia di e deporte aki, el a inidca cu riba nivel halto ta hopi conoci cu atletanan ta competi te cu 23 of 24 aña, e ta depende tambe di e atletanan mes y ki sorto di sosten nan ta haya di scol tambe.

Den su caso, el a bisa, e no sa ainda te ki edad e lo competi, pero lok e sa si ta cu e kier yega na comeptencianan grandi. “Mi sa cu mi kier logra yega un Panamericano y ken sa, tal bes un mundial. Aworaki mi ta bayendo suabe y tumando e cosnan un pa un manera cu nan bin,” el a enfatisa.

Ariana ta conta cu aña pasa el a lesiona su rudia. Net e tempo el a cuminsa train mas pisa, y esey a desmotive hopi pasobra tabatin competencia internacional na Aruba y e no por a competi. Pa supera su lesion el a haci terapia y alrededor di januari el a cuminsa train full back y el a logra bay un competencia na Miami.

“Esey tabata un tiki dificil pasobra mi tabatin un tiki miedo ainda, pero mi a logra bay e competencia y el a bay bon,” el a resalta.

Manera cualkier deporte, den rhythmic gymnastcis tin hopi risico di lesion, pero Ariana ta conta cu despues di su lesion el a bira mas conciente di su curpa y e ta purba scucha su curpa miho.

“Ora cu mi sinti cu mi ta hopi swak, mi sa cu mi no por train duro y forsa mi mes. Mi rudia tambe mi tabata pone tape pa basta largo y ora mi tin cualkier dolor mi ta pone crema y mi ta massage tambe,” el a agrega.

Como un hoben deportista, Ariana su mensahe pa hubentud ta: “Mi ta haya cu deporte of cualkier pasion mester ta un di e cosnan mas importante cu un hoben tin pasobra e ora bo tin algo cu bo ta anhela pe, bo tin metanan y mi ta sinti cu tur hoben mester tin un pasion pa algo. E por ta musica, baile of deporte. Tambe nan mester kere den nan mes. Ora mi tabata mas chikito mi tabata lucha y mi tabata keda bisa mi mes cu mi no por, pero e ultimo dos añanan ki mi a purba di cambia mi pensamento, purba di saca tur e pensamentonan negativo y enfoca ariba mi metanan y pasion.”

Por ultimo, Ariana ta gradici su mama y su tata, su apoyo di mas grandi pa tur cos y su coachnan Adriana y Hida cu a yude y guie den su preparacion pa e competencia importante aki.