Minister di Labor Paul Croes a defende su maneho pa aumenta e sueldo minimo entrante februari 2016. Esaki e ta considera como un compensacion pa ‘un aumento di inflacion durante e ultimo 3 añanan’. Pero ora di analisa e argumento aki no ta cuadra cu e cifranan.
Tin un ley cu ta regla e asunto di sueldo minimo. Articulo 13 ta bisa cu minister por adapta e suma di e sueldo minimo a base di e indice di prijs di consumo. E por haci esaki a base di e siguiente calculacion para den e mesun ley: tuma e prijsnan na augustus den e aña coriente (2015) y compara (aumento) esaki cu e prijsnan na augustus di e aña anterior (2014). Bon Dia a analisa e cifranan di augustus 2014 y no tabatin inflacion (-0.3%) pero un ‘deflatie’ (prijsnan a baha compara cu augustus 2013). Pues esaki no ta cuadra cu locual minister a bisa. Na augustus 2015 e indice si ta mustra cu e prijsnan a subi y e cambio averahe ta mustra cu por papia di un inflacion (1%).
Analisando e tres aña cu minister a menciona, esta 2013, 2014 y 2015, tampoco por papia di tres aña di inflacion consecutivo . Pasobra na 2013 tabatin un deflatie di 2.4% pues e prijsnan a baha compara cu 2012. E prijsnan a sigui baha den e prome 9 luna di 2014, pa despues cuminsa subi un tiki (2014 a caba cu un inflacion di 0.4%). Y te awor (november 2015 a base di e ultimo cifranan di CBS) e prijsnan no a subi mucho hopi mas, (0.7%).
Pa motibo di esaki entre otro, e organo consultativo economico, esta SER, a conseha gobierno pa adapta e sueldo minimo no mas cu 1%, si mester. Den e organo aki tin representante di gobierno, trahado y dunado di trabou. Pues tur tres partido ta representa den SER pa duna un conseho balansa riba e efectonan economico y social.
Tardansa
E ley menciona ariba tambe ta stipula cu cada adaptacion di e sueldo minimo gobierno lo mester introduci riba 1 di januari di e siguiente aña. Pues den e caso aki 1 januari 2016. Ya gobierno a indica cu e ley necesario (Landsbesluit) no ta keda cla na tempo y a hala e fecha pa 1 di februari.
Mester menciona cu e ley ta duna espacio pa gobierno pa haci cierto excepcion. Ta papia di ‘bijzondere omstandigheden’, pues circunstancia excepcional. Pero tardansa den e proceso legislativo no ta keda considera como un circunstancia excepcional.
Un otro argumento pa aumenta e sueldo minimo, segun e minister di Labor ta cu asina lo compensa tambe e efecto di e aumento di BAZV di 1%. Sinembargo ta e mesun gobierno cu a introduci e impuesto aki y tambe a hisa e porcentahe.
