Hopi añanan atras na Republica Dominicana, Jose tabata trahando banda di un cas unda cu sin cu e sa, su futuro pareha, cu ken 50 aña despues, e ta comparti 5 yiu, y un gran matrimonio.
Riba e dia afortuna aki e pareha aki a conoce otro, y aki a cuminsa un storia cu te dia di awe ta sigui desaroya. Despues di a logra vence tur obstaculo cu cualkier pareha hoben por enfrenta na caminda, nan amor a triunfa hasta ora cu nan mester a sali for di nan pais. Cu confiansa den otro, y un amor incondicional, poco poco nan a crea un bida hunto aki na Aruba, unda cu nan a crea un hogar pa nan 5 yiu muhenan.
Un hogar cual awendia ta unda nan ta disfruta di tur loke hunto nan a logra rondona di nan famia na ken hunto nan ta duna un amor familiar incondicional, Jose como un casa responsabel y perseverante, cu semper tabata presente pa apoya y sostene su famia, y Argentina como un mama y un casa dedica na su hogar, cu hopi amor, comprension y sabiduria.
Awe, nan tin 8 nieto y te hasta un bisanieto, kendenan ta mira e grandesa y forsa di amor den nan welo y wela. Nan ta un ehempel pa tur cu ta rondona nan, di con bunita amor por ta ora cu bo ta cuida di esaki y balora esaki, semper consciente cu mester dedica nos mes na proteha y dedica tempo na otro, pa asina e relacion y amor por keda bibo aña tras aña.
“Pa por tin un relacion of matrimonio duradero, mester tin hopi pasenshi. Tur relacion ta pasa den duro, y un matrimonio mas ainda, pero ta importante pa semper keda paciente y di tin hopi tolerancia pa cu bo pareha,” nan a comenta.
“Cu hopi union, y un bon comunicacion entre pareha, relacion, matrimonio y mas importante, e amor, por dura hopi mas di loke nos ta imagina.”
