E mega yacimento di petroleo y gas no convencional di Vaca Muerta, na Patagonia Argentino, no ta e unico carta energetico cu e pais tin pa recupera nan ‘auto abastecemento’, un anhelo di cual nan ta papia desde por lo menos un decada pasa.

E biento fuerte di e provincianan di sur y e solo di e provincianan den Norte, te awor no tanto probecha, a drenta rapidamente riba mapa di e recursonan alternativo.

Na 2017, Argentina tabata e segundo pais na mundo den cual e inversionnan den energia renovabel a crece mas, cu un aumento cerca di 800%, tras di Emiratonan Arabe Uni, segun datonan di Bloomberg New Energy Finance (BNEF), un firma specialisa di Bloomberg cu ta sigui e paisnan unda a inverti por lo menos mil miyon dollar. E sumanan cu a hinca den e pais sur Americano, como 1800 miyon dollar, ta un parti chikito di e 333.000 miyon cu a inverti na mundo, pero ta mustra cu e pais a inicia un careda acelera pa sali di e atraso cu e tin ainda den generacion di energia limpi, cu ta representa apenas 1% di e capacidad instala, un diesun nan mas abao di e region, compara cu por ehemplo e 14% di Chile o e 8% di Brasil, segun cifra di Bloomberg New Energy Finance pa 2017.

E inversionnan di 2017 tabata solamente e prome resultadonan di‘renovar’, un programa di licitacion publico lansa na 2016 den cual a adhudica 147 proyecto di energia renovabel cu ta suma 4.466 MW, ekivalente na e electricidad cu ta cubri demanda di 4,5 miyon hogar. Tabatin tres ronda di su basta cu ta representa 7.000 miyon dollar pa ehecuta prome cu 2020. Un tanda nobo di licitacion, segun informacion di e ministerio di Energia y Mina, ta den preparacion pa lansa durante e segundo mita di e aña aki.

E prome campanada pa e inversionistanan a cuminsa mira den direccion di e pais na 2016 tabata e reglamentacion di un ley nobo di energia renovabel aproba e aña anterior. E norma nobo a fiha e meta di 20% di generacion di fuente limpi pa 2025 y a establece penalisacion pa e usuarionan grandi (generalmente empresanan industrial) cu no ta cumpli cu cierto porcentahe di consumo di fuente no convencional, cu exigencia creciente desde 2018. “E ley tabata un paso grandi y e licitacionnan di renovar tabata otro bon señal pasobra nan tabata bon organisa, cu hopi detaye den nan reglanan”, Ana Verena, analista di e mercadonan sur Americano di BNEF, ta confirma for di nan oficina na São Paulo.