Argentina ta limita entrada aereo di su propio hendenan na maximo 600 pa dia

(Mercopress)—“Hendenan por sali di Argentina, pero nan mester sa cu no ta sigur cu nan por drenta back ora cu nan mester bolbe,” Asina Director di Migracion di Argentina Florencia Carignano a bisa e fin di siman aki. E Director a adverti esnan cu a sali di e pais cu avion cu e medidanan pa limita pasaheronan aereo drenta ta conta pa tur hende. Argentina a limita entrada di pasaheronan cu ta drenta cu avion di 2000 pa 600 pa dia, cu ta representa mas o menos dos vuelo pa dia. “Tur tabata sa cu esaki lo pasa,” Carignano a bisa. “Nos no ta e unico pais cu e medidanan impopular aki,” el a agrega.

Motibo di e paso drastico aki pa limita entrada di biaheronan cu ta bin cu avion ta e lucha contra e contagio di COVID-19, cu tin gran parti di Sur America den su gara.

Pasaheronan di Aerolinea COPA cu mester a cambia avion na e aeropuerto internacional di Tocumen na Panama a keha Diadomingo cu e decision a laga nan den limbo, despues cu nan vuelo pa Buenos Aires a keda cancela pa motibo cu no a haya permiso di parti di autoridadnan Argentino pa aterisa.

Carignano a hustifica e medidanan nobo como un forma pa purba wanta e entrada di e variantenan nobo di e coronavirus den e pais, y a bisa cu e restriccion actual lo keda vigente por lo menos te cu Augustus 31.

Mas ainda, esnan cu si por drenta, mester observa e isolacion obligatorio na zonanan estableci pa e autoridadnan provincial y e ciudad di Buenos Aires. E costo di e estadia y isolacion, ademas di e costonan di e testnan ta core pa cuenta di e pasaheronan.

Restriccionnan similar ta aplica pa e transporte pa medio di riu pa y for di Uruguay, cu a forsa e operado di tour Buquebús corta nan servicio na uno pa siman. “Solamente Argentino por drenta Argentina,” Carignano a enfatisa. El a sigui bisa cu e medida a yuda pa evita cu e sistema di salud por a cay den otro. “E ta ingenuo pa kere cu e variante Delta lo no drenta. El a sosode na Israel, unda casi 70 porciento di e populacion ta vacuna.”

E Director di Migracion a hustifica e restriccionnan nobo pa motibo cu siman pasa a constata cu como 45 porciento di esnan cu mester a keda bou cuarentena no a cumpli cu esaki. “E cuarentena no ta algo di hunga cune,” Carignano a bisa, agregando cu hopi hende cu yega di exterior ta cuminza mustra sintoma di COVID-19 despues di dos a tres dia. “Si e hendenan ey ta sigui move rond, y nan tin e variante Delta, nan lo plam’e rond di e pais. Pa e motibo ey e cuarentena ta importante. E no ta un problema cu un hende yega mas laat di nan vakantie, pero e medida ta pa duna prioridad na actividad domestico y pa percura cu Argentinonan ta vacuna.”

E oficial a insisti cu cualkier cu a test positivo, lo keda cera den un hotel cu nan contactonan mas yega, ya cu a keda determina cu control pa medio di telefon no ta traha. “Ami no ta mira cua ta e problema. Hendenan no ta forsa pa bay di Argentina. Nan ta acepta e responsabilidad economico y con e estado ta impone medida ora nan bolbe. Esun cu ta dicidi pa biaha durante un pandemia sa cu fronteranan por cera of habri. E no ta nada nobo,” Carignano a declara.