Argentina a legalisa auto-cultivo di marihuana pa uso medicinal y lo permiti benta di azeta, crema y otro productonan deriva di e planta na boticanan autorisa, segun e reglamento nobo publica ayera diahuebs den Boletin Oficial.
E regulacion, firma pa presidente Alberto Fernandez, ta pone fin pa e criminalisacion di esunnan cu ta cultiva cu fin terapeutico.
“No por prolonga e creacion di un marco reglamentario cu lo permiti un acceso oportuno, sigur, inclusivo y protector di esunnan cu ta rekeri utilisa cannabis como herment terapeutico”, e reglamento di ley di cannabis medicinal cu ta reemplasa esun cu tabata vigente desde 2017 ta bisa. E principal cambio ta cu for di ayera tur persona cu mester cultiva cannabis pa trata nan malesanan of di otro persona – nan lo por hacie di forma individual of cu asociacionnan – di manera legal.
Te awor, e posesion di simianan y planta di marihuana tabata castigabel penalmente, sin excepcion, pa ley di droga (23.737) te cu hasta 15 aña di prizon. Ademas, e reglamento anterior tabata limita e uso di cannabis medicinal pa un patologia unico: epilepsia.
Esnan cu lo cultiva mester inscribi na Registro di Programa di Cannabis (Reprocann) cu lo emiti autorisacionnan corespondiente. “E pashentnan lo por inscribi pa haya un autorisacion di cultivo pa nan mes, a traves di dje of un familiar, un di tres persona of un organisacion civil autorisa pa Autoridad di Aplicacion”, e texto ta señala.
Pa haya autorisacion lo tin mester un prescripcion medico y consentimento corespondiente. E reglamento te awor no ta establece un cantidad maximo di mata pa domicilio y esey a keda pendiente pa un futuro resolucion.
E legalisacion di cultivo di cannabis pa fin medicinal ta supone un victoria y un reconocemento pa esunnan cu ta mobilisa desde añanan caba cu e obhetivo aki na Argentina. “Nan a organisa rednan y organisacionnan civil cu aworaki ta gosa no solamente di reconocemento huridico, sino tambe di legitimacion social.
