Gobierno di Argentina e siman aki ta bay busca di para e crisis consecuencia di e derota di oficialismo den eleccionnan primario y cu e cual augustus a bira un di e pio lunanan pa e mercado local financiero recorda desde e crisis di aña 2001.
‘Black August’ a duna resultadonan desastroso: Accionnan lider a cay 41.5%; e bononan tambe a cay na 55% den promedio, e prijs di dollar den plasa di cambio local a subi 35,8% y e indice di riesgo a subi cu 224%, na 2.532 di puntonan basico, su nivel maximo desde 2005.
E inversionistanan ta den modo di panico desde cu e eleccionnan primario, cu a tuma luga tres siman pasa, cu un resultado cu ni un di su protagonista tabata espera: e peronista Alberto Fernandez, candidato presidencial di Frente de Todos, a caba cu 47,78% di e votonan y a keda den un posicion comodo pa e eleccion general di dia 27 di october proximo.
Presidente Mauricio Macri, kende ta aspira e reeleccion y a logra 31,79% di e voto, a culpa e crisis den e mercadonan na e desconfiansa cu su rival electoral, y compañera di formula di dje Cristina Fernandez di Kirchner (2007-2015), a crea cu e inversionistanan.
Di nan banda, nan ta culpa Macri, y nan a duna e responsabilidad di hinca e pais den debe y hib’e pa un escenario di recesion halto, inflacion halto y fuga di capital.
