(infobae) – “E reunion aki tabata programa cu unico efecto di ricibi e descargo di e huesnan Maqueda y Lorenzetti. Como cu nan no a bin, e reunion a bira abstracto.” Cu e palabranan aki, presidente di comision di Huicio Politico, Carolina Gaillard a conclui e encuentro apenas algun minuut despues cu el a cuminsa.

Inmediatamente, e diputadonan di Frente de Todos a lanta y a bandona e sala lihe, entre grito di e representantenan di Juntos por el Cambio, kendenan a denuncia cu oficialismo ta purba di sconde un operacion “di spionahe ilegal.”

Dialuna, e investigacion pa spionahe riba un grupo di hues, entre nan miembronan di Corte Supremo, a tuma un birada inespera despues cu Fabian “Conu” Rodriguez, un homber di La Campora kende awendia ta ocupa un cargo clave den e AFIP, a keda detenido pa motibo di e recuperacion di algun mensahe elimina for di celular di ex-polis cera, Ariel Zanchetta, un spion inorganico kende ta bisa di ta periodista.

Den celular di Zanchetta tambe ta aparece combersacion cu diputado kirchnerista Rodolfo Tailhade, kende tabata entre su contactonan. Entre e combersacionnan ey, ta aparece un link manda pa Zanchetta na e legislador cu dialogonan di participantenan di e biahe na Lago Escondido, un reportahe di causa contra e ex-diputado Elisa Carrio, y datonan cu ta ofrece contra senador di PRO, Luis Juez.

Tailhade ta miembro di Comision di Huicio Politico, y oposicion tabata spera di reprend’e pa su vinculo cu Zanchetta. Cerca di Tailhade a splica Infobae cu e diputado a presenta dilanti Husticia pa entrega su celular. Ta argumenta cu maske e tabata ricibi mensahe di Zanchetta, e nunca a contesta.

Juan Manuel López, di Coalicion Civico, a afirma cu “oficialismo huy morto di miedo pasobra nan no kier pa nos mustra cu tabata un agencia di inteligencia na shelo habri maneha pa Tailhade.”

Despues di 24 reunion y mas di 60 testigo, e proceso di huicio politico cu a cuminsa dia 26 di januari ultimo mester a conclui cu e dictamen di acusacion prome cu dia 17 di november, fecha riba cual e comisionnan ta stop di funciona. Sinembargo, e momento tabata resulta hopi inconveniente den terminonan politico pa e candidato presidencia Sergio Massa, kende ta buscando di evita un escala cu e maximo tribunal den e recta final di campaña. Specialmente mirando cu dos diputado cu ta constitui e mayoria oficialista den e comision – Ramiro Gutierrez y Micaela Moran – ta bin di Frente Renobador.

Massa nunca a manifesta explicitamente contra di Corte Supremo, pero cu su diputadonan a permiti tacitamente pa e proceso continua durante ultimo aña. Pa esaki, a duna orden pa pospone e periodo di sesion ordinario te dia 9 di december, loke en practica a permiti oficialismo pa pospone e dictamen te cu despues di eleccion.

E resultado diadomingo dia 19 di november ta bay tin impacto directo riba e futuro di e proceso di huicio politico.

Riba potret: Rodolfo Tailhade.