(Infobae/) – Desde cu el a drenta politica, e lider di e aliansa PRO a rechasa e posibilidad di kita e penalisacion di aborto. Su aprobacion pa un discusion parlamentario ta marca un cambio den su posicion.

Te awe Mauricio Macri a mustra di ta un fuerte opositor di aborto sigur, legal y gratis, cada biaha cu e tabatin e posibilidad di expresa esaki. Sin embargo, algo a cambia den e ultimo siman cu a haci cu el a cambia manera cu e ta posiciona su mes encuanto e tema. Asina el a actua den e reunion cu legisladonan, cu a termina cu e mandatario habriendo paso pa tene e discusion den Congreso.

Ta cla cu e presidente ta sigui pensa mescos: e ta contra interupcion boluntario di embaraso. El a expresa esaki na 2003 tempo cu el a enfrenta su adversario como candidato pa hefe di gobierno di e ciudad di Buenos Aires, manera ta e titulo di  e alcalde. Y el a ripiti su opinion na 2005 tempo cu el a bay Congreso. Y a mantene esaki entre 2007 y 2011 den e puesto di hefe di e Capital Federal.

E ultimo biaha cu a puntr’e encuanto e tema, na 2016,  el a ripiti su conviccion: “Mi ta defende bida desde su concepcion te na morto.” Pero Macri no ta keda sin nota e interes social y politico cu e discusion ta lanta. Y tin un antecedente cu a marca pa semper su relacion cu Papa Francisco. Na 2012, despues di un veredicto di corte supremo tocante e interpretacion cu huesnan mester duna na articulo 86 di e codigo penal (aborto no castigabel), e capital federal a bira un di e prome districtonan pa difundi un protocol di actuacion den e hospitalnan.

Aki segun varios observador a cuminsa un guera friu cu e arsobispo di e tempo ey, awor Papa Francisco, tocante aborto. Pero kico ta e interes awor di e presidente pa permiti e tema bira tema di debate den congreso? Uno ta e presion social, pa sikiera e nivel politico permiti un discusion di e tema, despues cu recientemente demostracionnan publico a mustra cu no por sigui ignora esaki. Y e otro consideracion ta politico. Macri por bay den historia como e presidente cu ta saca aborto for di codigo penal? Por ta cu e asunto no ta yega asina leu, ainda, pero Macri a mustra di ta sensitivo pa tendencia den sociedad.