Polis di Argentina a detene cuatro persona pa e asesinato di un turista Britanico na Buenos Aires diasabra ultimo, aunke e detenidonan no ta e autornan di e balanan, kendenan ya ta identifica, segun a informa ayera e secretario di Siguridad Porteño, Marcelo D’Alessandro.
Polis tambe a haya e auto cu a participa den asalto, cu a pasa na disposicion di Departamento di Criminalistica pa busca restonan y prueba, despues di realisa 18 registro na casnan di e provincia di Buenos Aires y e capital.
Den e proceso aki tabata clave e imagen proporciona pa camara di siguridad di e ciudad.
“Unabes nos a haya e imagen nos por identifica e autonan y asina sigui e ruta di fuga cu nan tabatin cu e camaranan cu nos tin den e ciudad”, D’Alessandro a destaca den un conferencia di prensa conhunto cu e Minister di Siguridad Nacional, Sabina Frederic, y e Vice-Hefe di Gobierno Porteño, Diego Santilli.
Di e cuatro persona deteni, un ta e persona encarga di proporciona e logistica, ‘cu tabata e autonan’, di un gang criminal cu Polis tabata investiga, ya cu ‘no ta e prome hecho cu nan a realisa na e ciudad di Buenos Aires’.
E gang principalmente tabata traha na aeropuerto internacional di e localidad di Ereiza, unda nan ‘tabata detecta esunnan cu tabatin holoshi di halto gama’ y despues ‘nan tabata sigui e persona y eynan nan tabata horta’.
E dos persona cu a tira e balanan ta identifica caba y Polis ta ‘trahando riba e detencion’.
Minister Frederic a califica e hecho como ‘atroz’ y el a sigura cu e trabou cu nan a haci prome cu e banda ta facilita e investigacion.
