Miembro di prensa rond mundo ta duna eco na e noticia di reclamo cu e organisacion “Tupac Amaru” a haci hunto cu otro grupo social, pa solicita liberacion di nan lider, parlamentario Argentino Milagro Sala. E bataya cu ta busca e liberacion di e diputado tin mas di 12 luna na frontera di sur y awor varios comite di solidaridad ta hala atencion na Europa y otro lugar, cu un pedido inmediato di liberacion di e activista social ey, mientras cu autoridad ta sigui cu varios proceso na su contra.
Organisadornan a anuncia tambe un protesta cu nan a yama ‘gran tuitazo’ riba rednan social, unda tur hende ta bay pone e ultimo mensahe cu diputado Sala a post riba Twitter e dia cu el a ser deteni. E mensahe tabata papia tocante su detencion. “Na momento aki polis di Gerardo Morales ta detene mi, e situacion aki ta manera un dictadura.” Milagro Sala ta cumpli ayera un aña den prizon na Jujuy, y pa tal motibo poblacion di Argentina a participa den varios actividad cu obhetivo di rechasa su detencion. Awor ta continua tambe e controversia entre gobierno di Gerardo Morales y organismonan internacional, kendenan ta pidi liberacion di Sala.
