Camara di Comercio Argentino – Brasileño di Argentina (CAMBRAS) a difundi un informe cu dato tocante comercio bilateral Argentina Brasil.
E informe a destaca cu Argentina a aumenta su importacion di bienes di capital (destina na inversion productivo) proveniente di Brasil cu 43%, durante prome diesun luna di 2017, cu ta di 49% den vehiculo terestre, 15% den tractor; 19% den otro mashin y aparato mecanico, piesa y acesorio; y 4% di pomp, y nan piesanan.
Na november e principal socionan comercial di Argentina (exportacion y importacion) tabata Brasil, China y Estadonan Uni, den e secuencia aki. Na nivel general, e exportacion pa Brasil a alcansa USD 835 miyon den e luna, y e importacion desde e pais aki tabata pa 1.672 miyon dollar. E saldo comercial tabata mustra un deficit di 837 miyon dollar pa Argentina.
Di banda di Brasil, acumula te na november, e exportacionnan pa Argentina a mustra un aumento di 32%. E analisis di e comercio bilateral cu Argentina den e lapso aki a laga como resultado un surplus pa e socio di Argentina den Mercosur di USD 7.355 miyon, como 83% mas cu e balor alcansa den e mesun periodo di 2016.
E dinamica comercial ta relaciona cu e ritmo di actividad economico, cu na Argentina a mustra na october un crecemento interanual di 5,2% mientras cu e avance compara cu september tabata di 0,2%. Di acuerdo cu informacion oficial, tur sector a yuda impulsa e crecemento interanual cu excepcion di e explotacion di electricidad, gas y awa.
Argentina a conoce un crecemento economico di 3% na 2017, pero cu e contra tempo di un inflacion halto di 24%. Pa 2018 e pronostico ta pa yega na un aumento di e Producto Interno Bruto (PIB) di 3,5%, cu miho control riba inflacion.
