Subsecretario general di presidencia di Argentina, Valentín Díaz Gilligan, a sconde 1,2 miyon dollar (980.000 euro) na Andorra, un pais di 78.264 habitante entre Spaña y Francia unda te aña pasa tabata existi secreto bancario. E placa a keda riba un cuenta na Banca Privada d’Andorra na nomber di un compania, segun e documentacion na cual e corant El Pais tabatin acceso.
Díaz Gilligan, funcionario halto di gobierno Argentino, cu ta traha directamente bao di presidente Mauricio Macri, a aparece na e banco como representante di e empresa y accionista. Sinembargo, e mandatario ta indica cu e fondonan no tabata di dje.
A habri e cuenta na 2012, tempo cu Díaz Gilligan tabata asesor di e Ayuntamiento di Buenos Aires. Y el a mantene su actividad, por lo menos te december 2014, tempo cu e politico tabatin un aña como director general di promocion turistico di e consistorio di Buenos Aires.
E cuenta tabata na nomber di e empresa Britanico di intermediacion di hungado di futbol Line Action. E empresa ta 100% propiedad di un empresa Panameño, Nashville North Inc.
“Como consecuencia di e nombramento di e accionista como director general di turismo di Argentina, esaki ta dicidi di bandona e actividad comercial cu e tabata eherce a traves di Line Action y ta bende e sociedad dia 3 di november 2014,” segun un acta confidencial di BPA.
Díaz Gilligan ta insisti cu e placa tabata di otro persona, y cu e tabata accionista y director di Line Action pa haci un amigo un fabor. “Francisco Casal tabatin problema na su pais y a pidi mi e fabor. E tabatin un huicio cu autoridad fiscal y no por a aparece e mes. Mi a confia riba dje. E placa nunca tabata di mi. Ademas, e tempo ey mi no tabatin un funcion publico. Mi tabata asesor y tabata factura como independiente,” e subsecretario di Mauricio Macri a bisa den un combersacion telefonico.
