Corte Supremo di Husticia di Argentina a rechasa pa unanimidad e recurso di keho (amparo) cu a ser presenta pa e actual senador contra e orden di aresto, dicta pa hues Claudio Bonadio na december 2017, cual e Alto Tribunal a pone pendiente di resultado di e pedido di ‘desafuero’ (perdida di inmunidad parlamentario), cu tabatin tratamento den Senado y cu te ainda no a yega na un conclusion.
Camara Nacional Federal di Apelacion pa caso Criminal y Coreccion a confirma e procesamento cu prizon preventivo pa e viuda di e tambe ex-presidente Nestor Kirchner y pesey el a presenta un recurso extraordinario den Corte.
Fernandez, hefe di estado entre 2007 y 2015, hunto cu varios miembro di su gobierno y otro colaboradornan ta procesa pa presunto encubrimento agrava, mediante un pacto cu Iran, di delito di e ciudadano Irani acusa di e atake riba e sociedad Hudiu (AMIA) na 1994, cu a laga 85 morto.
E caso hudicial a ser habri cu e denuncia di fiscal Alberto Nisman na januari 2015 contra gobierno di Kirchner, cuatro dia prome cu a haya Nisman morto cu un bala den su cabes, den condicionnan cu te ainda ta investiga, y cu ta mustra cu probablemente a asesina e procurador.
Tambe a solicita su aresto despues di e caso conoci como “causa del cuaderno”, den cual ta investiga un presunto red di soborno entre empresarionan poderoso y ex-funcionarionan halto di gobierno di Kirchner. Sin embargo, su detencion lo depende finalmente di votacion den Senado.
