(Infobae/La Prensa) – E ex-presidente di Argentina Cristina Kirchner lo mester bay pa testigua 13 di augustus awo, pa motibo di un investigacion di supuesto soborno miyonario y motibo dicon un cantidad di empresario y funcionario publico a ser deteni den oranan di madruga di diaranson pasa.
E hues Bonadio a haci e yamado pa motibo di investigacion cu a cuminsa pa motibo di e sospecha di e transportacion di tas cu placa den na auto di e Ministerio di Planificacion. Pa e caso aki tin mas di 10 persona cu a ser deteni, fuentenan oficial a informa. Bonadio a ordena tambe e aresto di Roberto Baratta, ex-secretario di coordinacion di ex-ministerio di Planificacion Federal Julio De Vido, cu a ser encarcela pa motibo di supuesto corupcion.
E caso a cuminsa na november di e aña pasa ora e ex-pareha di Oscar Bernardo Centeno, ken tabata chauffeur di Baratta a revela cu e tabata transporta tas yen di placa hunto cu Baratta y su colaboradornan. Na e informacion aki ta agrega e informacion di un periodista di e corant La Nacion, ora el a haya varios schrift di Centeno cu anotacion di tur e biahe cu el a haci. Eynan tambe tabata tin informacion de ken a topa cu Baratta y su colaboradornan pa haya placa y e luga e tin cu hiba.
Pa esey na e di dos ronde di persona cu a ser acusa na e caso aki ta inclui e ex-presidente, den momento cu na e schrift di Centeno tin anotacion na cual ta señala cu nan a hiba e tasnan pa Kirchner su famia na e cas di Quinta Olivos na Recoleta. Tambe a ser deteni e empresario Gerardo Ferreyra, di Electroingenieria y Javier Sanchez Caballero di Iecsa, y companianan constructor cu a gana varios contracto cu e gestion de De Vido. Dos persona di e sistema hudicial di e gobierno di Kirchner tambe a ser yama pa e investigacion, e ex-hues federal Norberto Oyarbide y e integrante di Auditoria General di e Nacion, Javier Fernandez, cu tambe ta aparece den e schrift.
Otro persona cu a ser yama ta Rafael Llorens, ex-subsecretario legal di Planificacion Federal. Ainda no ta defini si e yamado pa Kirchner ta na calidad di testigo of si e lo bay ta un acusado.
