Despues di e eleccionnan primario na Argentina, a popularisa un frase riba rednan social cu ta bisa: ‘Ezeisa ta e unico salida’. Esey hopi hende a skirbi pa motibo di incertidumbre causa despues di e resultadonan di eleccionnan PASO (Primario, Abierto, Simultaneo y Obligatorio) di dia 11 di augustus pasa. Cu e frase nan ta haci referencia cu e opcion ta pa sali for di e pais. Ezeiza ta e aeropuerto internacional mas grandi di Argentina.
E posibilidad cu e Kirchnerismo lo regresa na poder a empeora e situacion economico na e pais. P’esey e profesionalnan cualifica a cuminsa manda curriculum y solicitud di trabou pa otro paisnan manera Chile, Colombia of Brasil.
“No lo ta straño cu na final di aña nos lo cuminsa ricibi cu mas fluidez bishita di ehecutivonan Argentino cu lo sigui acumula, mas ainda” e fundado di e firma Chileno di buskeda di ehecutivo AMROP, Max Vicuña a señala.
Agustina Bertuzzi a studia pa PR, pero e ta eherce desde tres luna pasa na Chile. El a emigra y awor e ta busca talento di halto y mediano gerencia. “Nan a consulta mi hopi, con e bida ta akinan, con ta e salario, e costo di bida… pasobra nan ta pensa den un cambio obviamente, pasobra hopi hende sa caba kico lo bay pasa na october (durante eleccionnan presidencial), pero otronan no. Tin un grandi incertidumbre tocante kico lo pasa”, el a comenta.
