(AFP) – Argentina a busca un prestamo di $20 biyon for di Fondo Monetario Internacional (IMF), segun minister di Economia di e pais a bisa ayera, mientras gobierno ta lucha pa retene reservanan di divisa mientras ta reforsa un moneda enfermo.
Ademas di e solicitud pa $20 biyon na IMF, minister Luis Caputo a bisa cu Argentina – cu tin e debe mas grandi den IMF – tabata negociando un pakete adicional cu otro organisacionnan manera Banco Mundial y Banco Interamericano di Desaroyo (IDB).
Gobierno di presidente Javier Milei a anuncia e cifra preliminar memey di un corida contra e peso, impulsa pa miedo di un posible devaluacion, cu a ranca mas cu $1.2 biyon for di reservanan siman pasa.
E propuesta mester keda aproba pa e board di IMF, di cual su vocero, Julie Kozack a bisa ayera cu discusionnan cu Argentina, incluyendo pa un “pakete financiero cuantioso,” tabata “hopi avansa.” E no a duna un cifra pa e tamaño di e pakete.
Caputo a bisa cu e prestamo di IMF “no lo ser usa pa gasto financiero” sino pa recapitalisa e Banco Central di Argentina. Argentina tin un serie di default den decadanan recien, y IMF a rescata e di dos economia mas grandi di Sur America 22 biaha den pasado.
Auto-describi “anarco-capitalista” Milei a yega na poder na december, primintiendo di corta gasto, domina inflacion y drecha un deficit financiero profundo.
Den ultimo seis luna, e peso a cay como 10 porciento compara cu e dollar Mericano.
E prestamo nobo ta bay agrega na e $44 biyon existente cu Argentina ya ta debe IMF bao un acuerdo firma pa 2018 pa e prestamo mas grandi den historia di e banco.
Argentina tin un di e tasanan di inflacion mas halto na mundo, pero bao Milei, el a baha di 211 porciento YOY na fin di 2023, pa 84.5 porciento na januari.
E presidente a bisa cu un acuerdo nobo di IMF ta bay yuda sigura cu “inflacion ta solamente un mal recuerdo.”
Controla inflacion ta e capital politico principal di Milei mientras e campaña legislativo di medio termino ta acerca cu su partido – faltando un mayoria den Congreso – buscando pa aumenta su cantidad di asiento.
Kozack a bisa diahuebs cu Argentina “a encamina un programa di stabilisacion berdaderamente impresionante” y cu “reformanan a cuminsa duna fruto.”
Caputo a bisa cu e corida reciente contra e peso tabata resultado di “un intento pa desestabilisa gobierno di presidente Javier Milei”, cu el a culpa riba “oposicion.”
Gobierno a enfrenta protestanan semanal di pensionado, recientemente tambe uni pa fanaticonan di futbol, sindicato y organisacionnan social, cu e luna aki a rementa den enfrentamentonan violento cu polis.
Sindicato principal di e pais, CGT a haci un yamado pa un welga general pa dia 10 di april.
Na Argentina, tin cinco tasa di cambio diferente pa e dollar, cu un mercado preto prospero unda e asina-yama ‘dollar blauw’ diaranson tabata na mas cu 1,300 pesos pa dollar, mientras e tasa oficial tabata 1,091 pesos – e gap mas grandi den mas cu seis luna.
A pesar di e compromiso di gobierno pa stop control riba divisa cu ta na vigor desde 2018, e scarsedad di moneda stranhero no a permitie pa avansa.
