(EFE) – Ciudad de Buenos Aires y areanan rond di dje ayera dialuna a manece bao un manta di huma cu ta bin for di departamento San Jose di Uruguay, na unda diasabra ultimo a declara un candela.
For di prome oranan di dia, e capital Argentino y su poblacion tabata registra un capa di huma cu tabata cubri e edificionan mas halto y tabata dificulta e bista, igual cu loke a sucede diadomingo ultimo durante mainta.
Igualmente, bisiñanan a reporta a traves di rednan social un holo di kimamento intenso.
Principal aeropuertonan di e zona, aeroparke Jorge Newbery (ciudad di Buenos Aires) y aeropuerto internacional di Ezeiza (provincia di Buenos Aires) no a registra retraso den vuelonan tanto den yegada como di salida a consecuencia di e huma.
Diadomingo ultimo, Servicio Meteorologico Nacional (SMN) a informa cu e huma tabata bin cu e biento afectando principalmente e area metropolitano di Buenos Aires.
E presencia di huma y holo di candela cada biaha ta mas frecuente na Buenos Aires debi na candelanan forestal cu causanan natural y kimamento di terenonan pa actividadnan di ganado na e zona di e riu Parana na nort di e capital Argentino.
SNM a confirma cu mientras e candela ta sigui activo, e huma ta bay keda “por lo menos te diamars den oranan di anochi”, ora e biento lo tuma un otro direccion.
