(CNN) – Un blackout a tuma luga ayera diaranson na varios ciudad di Argentina. Secretaria a informa cu un sistema interconecta di coriente di e pais aki a registra “varios fayo” y esaki a genera blackout na varios luga, incluyendo Buenos Aires, Santa Fe, Cordoba, Entre Rios, entre otro.
Di acuerdo cu e secretaria, e fayonan aki a ocasiona cu varios central di generacion a sali for di funcionamento, entre nan esun di Atucha. “Tin un fayo di frecuencia cu ta saca afo algun central di generacion. E centro di generacion aki Atucha ta esun cu a sali,” e entidad a menciona tambe cu mesun cos cu esaki tambe a sucede na central di Puertos.
E interupcion den area metropolitano di Buenos Aires a sucede “despues cu central di Atucha a sali,” e agencia a splica.
Despues Secretaria di Energia a informa cu e fayonan tabata debi na candelanan den wayanan di coriente loke a causa e interupcion di coriente den varios ciudad di e pais. Un fuente di entidad a bisa cu un candela a afecta e wayanan di coriente di tension halto, esnan cu ta uni Campana cu General Rodriguez loke a provoca cu e proteccion di sistema di coriente a activa, ora esey ta sucede “tur cos ta cuminsa paga.”
Ademas, e compania di Agua y Saneamientos Argentinos (AySA) a informa cu e sistema di distribucion di awa potabel tabata sin coriente debi na e mesun faya aki pa loke nan a pidi na usuarionan pa “pa haci uso racional di e awa potabel” pa motibo cu produccion y distribucion di awa di e compania aki “ta electroindependiente.”
E candela a wordo produci memey di e temperaturanan halto historico cu e pais ta bibando, esaki ta e zomer mas cayente for di 1961, aña cu a cuminsa e monitoreo di temperatura segun Servicio Meteorológico Nacional.
