Aresto di ministro ta cambia ambiente pa eleccion?

Loke tabata colga den aire pa basta dia caba, finalmente a bira realidad. Pa prome biaha un ministro, sea suspendi o riba non actief, a wordo aresta bao di cargonan sumamente serio, despues di un proceso di varios luna, cu a conduci na reaccionnan diverso, di rabia pasobra nada ta sucede, te na expresion di no tin nada ey bao. Den curso di e siman y lunanan venidero nos lo haya sa mas ki rumbo e asunto lo tuma. Kico ta e situacion awe?

Na prome luga, e paso aki di Ministerio Publico ta mustra claramente cu e asunto ta asina serio manera Ministerio Publico a presenta esaki na inicio di e proceso na maart. Na e momento aya a formula e acusacionnan, pero den transcurso di e lunanan despues, pa mayoria di nos practicamente nada tabata sucede den e investigacion. Sinembargo, tabatin e arestonan cu tabata tuma luga cada tanto tempo, y e importancia di e personanan aresta tabata indica cu, manera Procurador General a declara den rueda di prensa ayera, nan tabata interoga prome e piscanan chikito pa despues yega na esunnan mas grandi. E detencion algun tempo pasa di un coordinador di e ministro, cu tabata envolvi tambe den e fundacion di campaña di e ministro, tabata un indicacion cu nan tabata yegando poco poco mas cerca di e mandatario, cu recoleccion di prueba contra su persona.

Sinembargo, tin indicacion cu e caso aki ta hayando un cierto profundisacion, cu ta haci cu e acusacionnan por haya un elemento adicional mas grave pa esunnan envolvi. Ora ta papia di mas di 2000 ontheffing di mercado laboral, y e envolvimento di tanto hende (30 persona scucha, di cual 21 interoga, 8 deteni, y 5 deteni actualmente), ta parce cu e delito adicional lo ta di institui y/o participa na un organisacion criminal cu e meta di comete crimen. Esaki ta un delito riba su mes, cu por percura pa un exigencia di castigo adicional. Ademas nos no ta papiando suma chikito aki. Na mil florin pa cada ontheffing ya ta trata di un suma di riba dos miyon florin… Y ta conoci den e circuito aki tin suma di soborno hopi mas halto.

Ademas tin un aspecto cu ta bay perdi den e uzo, boluntario o inboluntariamente, di termino cu no ta existi. Cada biaha atrobe nos ta nota den prensa cu ta papia di permiso di trabao, cos cu no ta existi pasobra e conseho positivo pa cu mercado laboral ta apenas e acceso na un permiso di residencia, cu ta ser emiti pa Dimas, cu ta cay bao di otro ministro. Si bo tin mas di dos mil caso di posibel soborno, lo no ta logico cu ta bay investiga tambe e parti di e mas di dos mil permiso di residencia cu a wordo emiti? Lo no ta logico cu aki ta bay investiga cada un di nan pa averigua cu a paga tambe pa haya e permiso? Ningun tramitador ta tramita ontheffing so, nan ta tramita henter e proceso. Awor, ken ta bay kere cu nan a soborna na grandi na labor, anto nan a keda leu di Dimas? No ta pornada cu nos a haya señal cu e team investigado a yega algun tempo pasa na e departamento aki tambe. Mescos cu nos a carga pasenshi te awor wardando riba e resultadonan cu a cuminsa sali ayera, nos ta warda tambe riba e resultadonan di e otro investigacionnan cu ta andando, tambe encuanto corupcion cu emision di tereno.

Pero, kico tur esaki ta significa pa e ambiente electoral? Sin bay den crea ambiente di hubilo o sarcasmo innecesario, nos ta kere cu ta un bon señal cu nos ta mirando un comienso di e fin di e impunidad ministerial cu a reina pa asina hopi tempo den e comunidad aki. Hopi ciudadano drechi, di tur color politico y esunnan sin color, tabata anhela di mira un dia esun cu supuestamente a haci malo, treci aden pa duna cuenta. Nos ta bisa explicitamente duna cuenta pasobra keto bay nos no ta hues pa duna veredicto. Pero si nos ta aplaudi cu e autoridadnan hudicial cu ta bin topa cu caso castigabel, ta haci nan trabao, sin distincion di ningun tipo.

Esaki riba su mes caba ta un señal cla pa esunnan cu ta desea di bay den politica pa haya cos, miho nan pensa esey dos y mas biaha. Pa e ciudadano un señal cu mester stop di pidi cos como condicion pa duna bo voto. Gobernacion no t’ey pa resolve bo caso particular, pero pa haci bon pa tur. Y haci bon pa tur significa percura pa e necesidadnan di tur ta cubri, no solamente di esunnan cu ta di bo color politico y cu ta bay probecha di privilegio, crea a costo di e demas hende den necesidad. Esey ta un crimen riba su mes, y esey ta loke tin Aruba unda cu e ta awe. Ban cambi’e pa un Aruba unda nos tin derecho riba gobernacion drechi, sin cu nos mester sospecha cu ta crimen organisa ta dirigiendo nos bida.