Durante ultimo dianan, Aruba a experiencia hopi awasero. Awa ta yobe pa rato y ta stop y ta bolbe cuminsa yobe. Den varios caso e awasero ta basha duro y manera ta conoci, e infrastructura di hopi caminda na Aruba no ta optimal y pa e motibo aki tin inundacion ta tuma luga y awa ta keda para na cierto caminda.
Dilanti Riu Hotel ta un area cu pa hopi tempo tin problema no solamente di awa cu ta keda para na e caminda dilanti e hotel, pero tambe nan tin problema cu awa sushi di riool cu ta bin ariba cada biaha cu awa yobe y ta causa un molester grandi, sin lubida e holor stinki cu esaki ta trece cune.
Den e dianan aki esaki no ta e excepcion. Un biaha mas, cu e awasero cu e cay aki aya den e ultimo dianan aki, reportero di Bon Dia Aruba por a constata cu e area specifico aki dilanti e hotel a bolbe inunda cu awa cu ta keda para y awa di riool cu ta bin ariba.
Esaki no solamente ta un molester, pero tambe sigur un mahos bista pa e turistanan cu ta bishita e isla y cu ta keda den e area di Palm Beach. Hopi di nan ta cana den e area aki y e awa cu ta para plus e holo stinki di e awa di riool ta haci cu nan no por cana den e zona aki.
Na mas di un ocasion a trece esaki pa dilanti y director di DOW, Sr. Marlon Croes, a yega di bisa DOW lo drecha e problema aki pronto. Den luna di maart, durante un conferencia di prensa, e director a splica cu nan tin un proyecto pa e area aki y cu nan tin e placa aproba door di Economische Zaken y Gobierno y cu lo pronto nan lo cuminsa e destaho publico pa e prome fase di e proyecto aki.
Segun el a sigui splica den e prome fase nan lo mester a pone tuberia nobo di rioolering y tambe e drenahe di awa ora cu awasero yobe.
Te ainda e problema aki ta persistente y no a wak ningun tipo di mehoracion pa loke ta e problema aki.
Potret di archivo.
