A identifica un tereno pa reloca 19 famia bibando na varios seccion di dump.

Minister di planificacion teritorial, Miklos Giterson, a bisa diabierna cu e tereno ta na Foga, un distancia cortico pero sigur for di e candela den dump. Cas prefabrica resistente pa horcan ta wordo busca pa Bureau Programa di Recuperacion Nacional. Ora esaki ta procura, e famianan lo ricibi un vivienda.

Awo ta keda na e famianan pa bay di acuerdo cu reloca. Famianan tambe tin opcion di ricibi fondonan y haya nan mesun vivienda.

E reubicacion di 30 persona for di e dump ta critico pa supresion di candela y otro proyectonan relaciona cu resolve e problemanan severo di maneho di desperdicio di e pais.

Giterson a bisa cu gobierno ta trahando hunto cu Banco Mundial y otro oficialnan pa cambia e ‘zona cora’ di dump pa un ‘zona geel’. Sinembargo, esaki lo tuma algun tempo.

Resolve e problema di desperdicio solido ta un di e proyectonan pa cual a aloca fondonan di e Recovery Trust Fund, administra pa Banco Mundial y financia pa Hulanda. Esaki ta nifica cu Banco Mundial, gobierno y residentenan finalmente lo mira cambio ora e caminda dilanti ta haya y aproba pa e Comite Director di e Trust Fund.

Sinembargo, no ta cla cuanto lo dura pa e proyecto tan necesario aki.

Vicepresidente nobo di Banco Mundial pa Latino America y Caribe (LAC), Axel van Trotsenburg, a bisa mientras el a finalisa un bishita di dos dia na St. Maarten cu e dump ta ‘rekeri un bon solucion’, pero cu lo ta ‘inteligente’ pa gobierno tin tur opcion prome cu procede den cualkier direccion.

E dump, como tambe e problema severo di repara cas despues di horcan Irma, no ta simpel, el a nota. Esaki a wordo sosteni pa prome minister Leona Romeo-Marlin. El a bisa cu pa drecha cada cas tin su propio retonan, desde si e doño ta involucra of no, te cu si e cas tabata construi cu permiso adecua. El a añadi cu gobierno, cu of sin e Trust Fund, no por repara tur cas cu a wordo daña.

Van Trotsenburg a bisa tocante e programa pa repara casnan financia mediante e trust fund cu tabata e prome biaha cu el a mira un ‘regalo’ asina wordo duna pa repara casnan individual. Hunto cu Romeo-Marlin, el a tene un conferencia di prensa pa cera locual a wordo clasifica como un bishita ‘di nivel halto’ di Banco Mundial pa e pais.

Tur oficial presente a bisa cu nan ta comparti ‘un cierto sentido di falta di pasenshi’ pa e velocidad di e esfuersonan di recuperacion, y ta trahando pa mehora esaki.