Area di mata di mangel (Mangrove Forest) ta cubri 1.15% di nos isla

En conexion cu Dia Internacional di conservacion di ecosistema di e matanan di mangel, Directie Natuur en Milieu (DNM) kier a comparti cu Aruba e grandura di e area na Aruba cu ta cubri pa mata di mangel.

DNM a calcula e area di cobertura haciendo uzo di e programa ArcGIS coordinating system Tranverse Mercator Aruba. E polygon (un figura geometrico), cu a uza pa midi e area total, ta indica cu mata di mangel ta ocupa 1.15% di nos isla. Uzo di e programa aki tabata posibel danki na colaboracion di Departamento di Infrastructura y Planificacion (DIP).

Mata di mangel ta esencial pa nos ecosistema; nan ta duna nos oxigeno, ta brinda proteccion pa fauna por procrea, biba, como tambe ta proteha e costa di erosion y hopi mas.

E areanan na unda ta haya mata di mangel ta: Rincon, Daimari, Zeewijk, Rif Renaissance, Bucuti Aeropuerto, Parkietenbos, Rif Palm Island, Zeewijk, Bubali Plas, Zeewijk, Boca Grandi, Bubali Plas, Mangel Halto, Rif Mangel Halto, Barcadera, Saliña Cerca, Eagle Beach, Plas The Mill, Santo Largo, Baby Beach y Rif San Nicolas. Tambe tin den e areanan di rooi den Parke National Aruba y na Rooi Prikichi.

Na Aruba nos ta haya 4 sorto di mata di mangel: Mangel tam, Mangel preto, Mangel shimaron, y Fofoti. Tur mata di mangel ta protegi pa e leynan local, manera hancra den e decreto nacional proteccion di flora y fauna local (Landsbesluit bescherming inheemse flora en fauna – AB 2017 no 48). Tambe nan ta proteha pa e protocolnan estableci door di convenionan internacional di Special Protected Areas and Wildlife, mihor conoci como e SPAW protocol.

E ecosistema di e matanan di mangel ta bou di menasa continuo door di diferente motibo y cambio. Historicamente, e menasa primordial tawata destruccion di e matanan di mangel pa traha luga pa diferente forma di agricultura. Otro menasa ta capmento di e matanan aki pa uza e palonan pa traha carbon y como material di construccion. Na otro parti di mundo ainda tin e mesun menasanan aki, pero ademas tin menasa nobo cu ta e.o. cambio di clima, polucion y desaroyo. E esfuersonan haci localmente pa proteccion di mas cu 16 area pa conservacion, tambe ta inclui e matanan di mangel. Asina tambe ta preveni destruccion di e ecosistema di e matanan di mangel y yuda aumenta e cantidad di e matanan di mangel cu ta cubri nos isla.

E fecha 26 juli, apenas proponi na 2015 pa UNESCO, a haya reconocimento como Dia Internacional di conservacion di ecosistema di e matanan di Mangel. E reconocimento aki ta na su lugar mirando tur e servicionan cu e matanan aki ta duna hende y bestia. Tin un cantidad grandi di parha, cangreu, yuwana, lisimbein, soldachi, cleconchi y pisca cu ta biba y crece den e reisnan di e matanan di mangel.

Henter aña ta bon pa aprecia y disfruta di e matanan di mangel y tambe siña mas di nan. Yuda splica e hobennan e balor di e mondinan di mata di mangel y e rason pakico nos mester proteha e ecosistema esencial aki. DNM tambe urgi e gruponan cu ta haci caminata rond di e areanan aki, pa informa y educa nan particpantenan riba e balor di e matanan di mangel.

Potret: Visit Aruba.