Pa loke ta trata e edificio di condominio ex-Mar Azul cu ta carga e nomber nobo di Harbor House, minister di Infrastructura, Otmar Oduber (POR) a laga sa cu e desaroyado lo haya luz berde pa sigui cu e trabou di reconstruccion aki.

Actualmente nan ta ocupa deliberando riba embeyecemento di area aki pa motibo cu gobierno tin algun plan adicional pa futuro. E ta referi na e area dilanti di Bestuurskantoor unda tin e parkinglot, y tambe e area banda di The Paddock, caminda tabatin ex-mercado di fruta of markthallen. Tur e parti aki -segun e mandatario- mester fit den e plan di Mar Azul. Si tur cos ta bon e ta calcula cu pa dos of tres siman mas gobierno lo mester firma un convenio nobo cu nan pa di e forma aki e acta di erfpacht por pasa, pa asina e renobacion completo di ex-Mar Azul por continua.

Bon Dia Aruba a yega di publica algun articulo tocante e proyecto aki y nan beneficio pa embeyece e area aki. Pero tambe algun preocupacion di parti di fundacion Rancho pa evita cu interes particular no bay trapa loke nan ta considera un patrimonio historico di e comunidad di Rancho, manera e area unda nan tin e pier of waf di Rancho y tambe e markthallen. Te hasta recientemente den cuadro di Aruba Doet, un grupo di boluntario recluta pa fundacion Rancho a bay haci limpi y verf e bakinan di cement poni den a area di asina yama Waf’i Rancho/Schoenerhaven.

Minister Oduber a informa cu tin un grupo di inversionista cu a cumpra e edificio aki pa desaroya e edificio cu pa basta tempo a keda practicamente bandona. Recientemente el a reuni cu e inversionistanan hunto cu su colega di turismo, Dangui Oduber (MEP), pa asina ta mas haltura di e proyecto aki. Ya caba tin cierto trabou y movecion cu ta tumando luga y si tur cos ta bon, pronto nos lo por wak mas actividad rond di renobacion di e proyecto aki. E ta considera e grupo di inversionista aki ‘hopi serio’. El a indica cu gobierno ta den proceso pa duna nan un aumento leve di 10 pa 12 camber adicional.

Manera e desaroyado a yega di splica e matutino aki, e ta un proyecto cu ta consisti di 94 apartamento y 19 local comercial situa den e ground floor. E parti residencial lo ta condominio.