Arco Iris Kleuterschool ta siña mas tocante parhanan di Aruba

Bon Dia Aruba a topa cu e muchanan di Arco Iris School cu tabata riba un ‘field trip’ cuminsando na Bubali Plas diabierna trempan pa siña mas tocante parhanan di Aruba.

Maestra Nyree Hart di Arco Iris School ta splica Bon Dia Aruba cu e idea tras di esaki ta pa educa e muchanan e aña aki riba e tema di parhanan di Aruba door di bishita tur e luganan rond di Aruba cu tin parha. E luga ideal tabata Bubali Plas y algun klasnan a bay Hooiberg, Parke Nacional y Phillip’s Animal Garden. ”E muchanan ta haya un papel unda nan tin cu marca tur e parhanan cu nan mira. Esaki ta pa siña nan cua parhanan ta di Aruba y cua di nan ta bini di afo.”

Importancia di naturalesa

Tur e muchanan di Arco Iris Kleuterschool cu ta bayendo eerste klas otro aña, a haci un spreekbeurt tocante parha cu ayudo di mayornan cual a bay hopi bon. Tur 8 klas na Arco Iris Kleuterschool a participa den e trip aki rond di e isla anto segun Juffrouw Hart, e muchanan ta bon na altura riba e importancia di naturalesa. Asina tanto cu e muchanan mes a trece pa dilanti den nan spreekbeurt entre otro nan admiracion di e shoco, cual awor ta un simbolo nacional. Bubali Plas ta ser reconoci pa Birdlife Internacional kende ta e asociacion di mas grandi na mundo pa locual ta trata conservacion di naturalesa. E asociacion aki tin un programa caminda nan ta clasifica cierto areanan importante bao di ‘Important Bird Areas,’ y manera Bon Dia Aruba a informa anteriormente, a wordo declara cu tin 4 di esakinan na Aruba. Bubali Plas, Tierra Del Sol, Saliña, Reef Islands Oranjestad & San Nicolas Bay Area, pero tambe Ramzaar Area y Spaans Lagoen ta otro dos cu ta hopi importante. Presidente di Aruba Birdlife Conservation, sr. Greg Peterson, a bisa Bon Dia Aruba algun tempo atras cu tur locual nan ta haciendo pa protege e 16 areanan nobo manera Teritorio di Naturalesa, ta specialmente pa e futuro generacion. Sr. Peterson ta bisa: “Nos no ta bay t’ey pa semper anto nos no kier pa e muchanan crece bira grandi, enfrenta un cantidad di problema anto wak bek y pensa cu nos nunca a haci nada pa protege e naturalesa.”