Diabierna anochi den Joe Laveist Ballpark a tuma luga e clausura oficial di Weganan Escolar (WE) Aruba 2023. Pa termina e dos siman di competencia deportivo den diferente disciplina y categoria, e ekiponan di futbol di mucha muhe y mucha homber di scolnan preparatorio a bataya riba veld pa e premio maximo.
Arco Iris Kleuterschool a sali victorioso durante Weganan Escolar 2023. E scol a competi den e disciplina di futbol cu nan ekipo di mucha homber y mucha muhe.
Den e categoria di mucha homber, e studiantenan a bataya contra Agnes Kkleuerschool pa di tres of di cuater luga y a duna nan maximo esfuerso. Na final di e wega, Arco Iris Kleuterschool su ekipo di mucha homber a keda na di cuater luga.
E ekipo di mucha muhe di Arco Iris Kleuterschool a haci un tremendo papel. Diabierna anochi nan a bataya riba veld contra Cacique Atarima Kleuterschool. Un wega yen di suspenso na unda na final Arco Iris Kleuterschool a titula campeon.
Adicionalmente Arco Iris Kleuterschool a ricibi tambe tres premio importante.
E premio di MVP (Most Valuable Player) den e disciplina futbol kleuterschool mucha muhe a bay pa e hungado estrella di e ekipo di mucha muhe, Rosevienly Simon, ken a destaca tur e weganan anotando golnan importante cu a yuda hiba su ekipo te na prome luga.
E premio di docente deportivo femenino di aña den e categoria di kleuterschool a bay pa juffrouw Gabriela Lopez, ken a traha incasablemente, hunto cu juffrouw Meloushka Dirksz, pa yuda y guia nan studiantenan na victoria.
E tan espera premio di scol deportivo di aña den e categoria scol preparatorio tambe a bay pa Arco Iris Kleuterschool.
Asina e competencianan deportivo a yega su final. Un pabien na tur scol ganador y tur cu a participa den e Weganan Escolar 2023.
